الیکشن اپیلوں کی بحالی کا اختیار ٹریبونل کو حاصل ہے‘ لاہور ہائیکورٹ

پیر 7 جولائی 2025 17:19

لاہور (اُردو پوائنٹ اخبارتازہ ترین - این این آئی۔ 07 جولائی2025ء) لاہور ہائیکورٹ کے جج جسٹس انوار حسین جو بطور الیکشن ٹربیونل خدمات سرانجام دے رہے ہیں نے ایک اہم آئینی و قانونی نکتے پر فیصلہ دیتے ہوئے قرار دیا ہے کہ الیکشن ٹریبونل کو عدم پیشی کی بنیاد پر مسترد شدہ اپیلیں بحال کرنے کا اختیار حاصل ہے۔جسٹس انوار حسین نے پی پی 201سے آزاد امیدوار محمد یار کی مسلم لیگ (ن) کے امیدوار نوید اسلم کے خلاف انتخابی اپیل پر 16صفحات پر مشتمل تفصیلی فیصلہ جاری کر دیا۔

فیصلے میں کہا گیا ہے کہ دسمبر 2024میں محمد یار کی اپیل درخواست گزار اور وکیل کی غیر حاضری کی بنیاد پر مسترد کر دی گئی تھی تاہم اب وہ اپیل بحال کر دی گئی ہے اور مزید کارروائی کے لیے وکلا کو آئندہ سماعت پر طلب کیا گیا ہے۔

(جاری ہے)

فیصلے میں واضح کیا گیا ہے کہ الیکشن ایکٹ اور اعلی عدلیہ کے متعدد فیصلوں کی روشنی میں الیکشن ٹریبونل کو مسترد شدہ اپیلوں کو بحال کرنے کا مکمل اختیار حاصل ہے، عدالت نے لاہور ہائیکورٹ اور دیگر اعلی عدالتوں کے نظائر (precedents)کو اپنے فیصلے کا حصہ بنایا ہے۔

تحریری فیصلے کے مطابق درخواست گزار کا وکیل ملتان سے تعلق رکھتا تھا اور سماعت کے روز ملتان بینچ میں مصروف تھا جبکہ محمد یار خود سانس کی تکلیف (پھیپھڑوں کے انفیکشن)میں مبتلا تھے جس کا میڈیکل سرٹیفکیٹ بھی پیش کیا گیا، مزید یہ کہ فیصلے میں موسمی حالات کا بھی ذکر کیا گیا کہ دسمبر میں سموگ اور دھند کے باعث سفر مزید دشوار ہوتا ہے، خاص طور پر ایسے مریض کے لیے۔

عدالت نے قرار دیا کہ اپیل کی بحالی کی درخواست کے ساتھ حلف نامہ بھی منسلک تھا جو اس کی قانونی حیثیت کو مضبوط بناتا ہے، لہٰذا ٹریبونل نے اپیل بحال کرتے ہوئے مزید کارروائی 26اگست تک ملتوی کر دی۔واضح رہے کہ آزاد امیدوار محمد یار نے مسلم لیگ (ن) کے رکن پنجاب اسمبلی نوید اسلم کی کامیابی کو الیکشن پٹیشن کے ذریعے چیلنج کیا تھا۔