بلوچستان اور آزاد کشمیر کے لیے 6 دانش اسکولوں کی منظوری قابلِ تحسین اقدام ہے،قائم مقام چیئرمین سینیٹ سیدال خان

پیر 7 جولائی 2025 23:29

اسلام آباد (اُردو پوائنٹ اخبارتازہ ترین - این این آئی۔ 07 جولائی2025ء)قائم مقام چیئرمین سینیٹ سیدال خان نے بلوچستان اور آزاد جموں و کشمیر میں دانش اسکولوں کے قیام کی منظوری کو ایک انقلابی قدم قرار دیتے ہوئے وزیر اعظم پاکستان میاں محمد شہباز شریف، پاکستان مسلم لیگ (ن) اور تمام اتحادی جماعتوں کی قیادت کا شکریہ ادا کیا ہے۔ ان کا کہنا تھا کہ یہ اقدام نہ صرف تعلیمی میدان میں ایک نمایاں سنگ میل ثابت ہوگا بلکہ پسماندہ علاقوں کے نوجوانوں کو معیاری تعلیم کے مواقع بھی فراہم کرے گا۔

ان خیالات کا اظہار انہوں نے وزیر اعظم کی ہدایت پر منعقدہ سینٹرل ڈویلپمنٹ ورکنگ پارٹی (CDWP) کے خصوصی اجلاس میں چھ دانش اسکولوں کے منصوبے کی منظوری کے بعد اپنے بیان میں کیا۔ ان منصوبوں کی مجموعی لاگت 19.25 ارب روپے ہے جن میں بلوچستان کے پانچ اضلاع اور آزاد کشمیر کے ایک ضلع میں اسکول قائم کیے جائیں گے۔

(جاری ہے)

قائم مقام چیئرمین سینیٹ نے کہا کہ یہ بورڈنگ اسکولز جدید تعلیمی سہولیات، تربیت یافتہ عملہ، اساتذہ کی رہائش اور چھٹی سے بارہویں جماعت تک کے طلبا و طالبات کے لیے بہترین تعلیمی ماحول فراہم کریں گے۔

ان اداروں میں جدید ٹیکنالوجی، کاروباری مہارت، ڈیجیٹل خواندگی اور روایتی اقدار پر خصوصی توجہ دی جائے گی۔انہوں نے کہا کہ ان منصوبوں کی مالی معاونت وفاقی اور متعلقہ صوبائی حکومتیں مساوی طور پر کریں گی، جو تعلیمی میدان میں وفاقی و صوبائی ہم آہنگی کی بہترین مثال ہے۔ سیدال خان نے امید ظاہر کی کہ ان دانش اسکولوں کے قیام سے بلوچستان اور آزاد کشمیر میں شرح خواندگی میں خاطر خواہ اضافہ ہوگا اور یہ منصوبے مقامی روزگار کے مواقع بھی فراہم کریں گے۔انہوںنے کہاکہ موجودہ حکومت تعلیم کو اولین ترجیح دے رہی ہے تاکہ پاکستان کے نوجوانوں کو بااختیار بنا کر انہیں قومی ترقی کا ستون بنایا جا سکے۔