Live Updates

خواجہ سلمان رفیق کا پی ڈی ایم اے ہیڈ آفس کا دورہ ،موسمی صورتحال اور مون سون بارشوں کا جائزہ لیا

منگل 8 جولائی 2025 20:42

لاہور (اُردو پوائنٹ اخبارتازہ ترین - این این آئی۔ 08 جولائی2025ء) صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے پی ڈی ایم اے ہیڈ آفس کا دورہ کیا۔خواجہ سلمان رفیق نے موسمی صورتحال اور مون سون بارشوں کا جائزہ لیا۔ایڈیشنل ڈی جی پی ڈی ایم اے سید جواد حیدر اور ڈائریکٹر حمیداللہ ملک نے صوبائی وزیر کو مون سون بارشوں بارے بریفنگ دی۔

صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے کہاکہ9 جولائی تک پنجاب کے دریاؤں میں پانی کی صورتحال میں غیر معمولی اضافے کا خدشہ ہے۔دریائے چناب میں مرالہ کے مقام پر اونچے درجے کے سیلاب کی وارننگ جاری کر دی گئی ہے۔ڈیرہ غازی خان کے رود کوہیوں میں فلیش فلڈنگ کی وارننگ بھی جاری کر دی گئی ہے۔

(جاری ہے)

لاہور، گوجرانوالہ، سیالکوٹ اور راولپنڈی ڈویڑن میں اربن فلڈنگ کا خدشہ برقرار ہے۔

ریسکیو 1122 کو تمام تر انتظامات کو پیشگی مکمل کرنے کی ہدایت کر دی گئی ہے۔ پی ڈی ایم اے پنجاب نے صوبہ بھر کی انتظامیہ کو مون سون بارشوں بارے الرٹ جاری کر دیا ہے۔ رواں سال مون سون بارشیں معمول سے 25 فیصد زیادہ ہونے کی پیشگوئی ہے۔ خواجہ سلمان رفیق نے کہاکہ وزیر اعلیٰ پنجاب مریم نواز شریف کی ہدایات کے مطابق انتظامیہ واسا اور ریسکیو ادارے الرٹ ہیں۔

پی ڈی ایم اے کنٹرول روم و صوبائی ایمرجنسی آپریشن سینٹرز الرٹ ہیں۔ شہریوں کے تحفظ کیلئے تمام تر وسائل بروئے کار لائے جائیں گے۔ صوبائی وزیرصحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے کہاکہ واسا سمیت تمام ادارے الرٹ رہیں اور نشیبی علاقوں سے نکاسی آب کو یقینی بنائیں۔شہری پی ڈی ایم اے پنجاب کی جاری کردہ ہدایات پر عمل کریں۔دریاؤں نہروں اور ندی نالوں میں ہرگز نہ نہائیں۔انتظامیہ دریاؤں نہروں اور ندی نالوں کے اطراف دفعہ 144 کا نفاذ یقینی بنائے۔