Live Updates

پی ٹی آئی کی میٹنگز میں کیا باتیں ہوئیں یہ مستقبل میں سنوائی جاسکتی ہیں

ہمارے پاس پوری خبر ہے کہ یہ کیا چاہتے ہیں، پی ٹی آئی کو احتجاج کرنے کی اجازت بالکل نہیں دی جائے گی، پچھلے احتجاج میں ملک بھر سے صرف 30 سے 35 ہزار لوگ نکلے تھے۔ وفاقی مشیررانا ثناء اللہ

ثنااللہ ناگرہ منگل 8 جولائی 2025 23:47

پی ٹی آئی کی میٹنگز میں کیا باتیں ہوئیں یہ مستقبل میں سنوائی جاسکتی ..

اسلام آباد ( اردوپوائنٹ اخبار تازہ ترین۔ آئی پی اے ۔ 08 جولائی 2025ء ) وفاقی مشیرسیاسی اموررانا ثناء اللہ نے کہا ہے کہ پی ٹی آئی کی میٹنگز میں کیا باتیں ہوئیں یہ مستقبل میں سنوائی جاسکتی ہیں، ہمارے پاس پوری خبر ہے کہ یہ کیا چاہتے ہیں، پی ٹی آئی کو احتجاج کرنے کی اجازت بالکل نہیں دی جائے گی۔ انہوں نے اے آروائی نیوز کے پروگرام میں گفتگو کرتے ہوئے کہا کہ عمران خان کے بیٹے برطانیہ کے پیدائشی شہری ہیں، وہ یہاں کے حالات اور کسی کو نہیں جانتے، ان کو یہاں لاکر لاقانونیت کا حصہ بنانا ایسا عمران خان ہی سوچ سکتے ہیں، عمران خان کے بیٹوں کو یہاں مشکلات ہوسکتی ہیں، برطانیہ کی ایمبیسی ان کو بازیاب کرائے گی اور پھر واپس لے کرجائیگی۔

اگروہ غیرقانونی احتجاجی تحریک کی قیادت کریں گے تو گرفتارہوں گے، 9 مئی کے بعد پی ٹی آئی پر کون اعتبار کرے گا کہ یہ پرتشدد نہیں ہوں گے۔

(جاری ہے)

پی ٹی آئی کو جلاؤ گھیراؤ کے احتجاج کرنے کی بالکل اجازت نہیں ہوگی۔ ہمارے پاس پوری خبر ہے کہ وہ کیا چاہتے ہیں، اس میں کوئی ابہام نہیں ہے، وہ جو خفیہ میٹنگ اور مشاورت کرتے ہیں تو کیا حکومت تک وہ چیزیں نہیں پہنچتی، پی ٹی آئی کی میٹنگز میں کیا باتیں ہوئیں یہ مستقبل میں سنوائی جاسکتی ہیں۔

پی ٹی آئی احتجاج کے نام پر جلاؤ گھیراؤ کرنے کا مقصد رکھتی ہے، بانی کے بیٹوں کو یہاں لاکر لاقانونیت کا حصہ بنانے کا کیا مطلب ہوسکتا ہے؟ جلسے جلوس احتجاج جمہوری رویے کے تحت ہوتے ہیں۔ پی ٹی آئی کوئی بھی تحریک چلانے کی پوزیشن میں نہیں ہے، پی ٹی آئی کو احتجاج کرنے کی اجازت بالکل نہیں دی جائے گی، پچھلے احتجاج میں ملک بھر میں صرف 35 ہزار لوگ نکلے تھے۔

یاد رہے میڈیا سے گفتگو کرتے ہوئے سابق وزیراعظم کی ہمشیرہ علیمہ خان نے بتایا کہ سلیمان خان اور قاسم خان نے پاکستان آنے کا اعلان کیا ہے کیوں کہ عمران خان کے بیٹے تحریک میں شامل ہونا چاہتے ہیں، اس حوالے سے عمران خان کو بھی آگاہ کر دیا گیا ہے، عمران خان کے بیٹوں کی برداشت ختم ہو چکی ہے اب وہ مزید نہیں سن سکتے، پہلے وہ امریکہ جا رہے ہیں وہاں اس رجیم کو ایکسپوز کریں گے۔