سدھرا پنجاب‘ مہم شروع، اب کسی چور اور ڈاکو کو آزادی نہیں ہو گی ، عظمیٰ بخاری

لاہور (اُردو پوائنٹ اخبارتازہ ترین - آن لائن۔ 10 جولائی2025ء) پنجاب کی وزیراطلاعات پنجاب عظمیٰ بخاری نے صوبے میں سدھرا پنجا ب مہم شروع کرنے کا اعلان کر تے ہوے کہا ہے کہ اب کسی چور اور ڈاکو کو آزادی نہیں ہوگی۔ لاہور میں جرائم کی شرح میں 68 فیصد کمی آئی ہے، دیگر علاقوں میں بھی جرائم میں کمی دیکھی جا رہی ہے۔ پریس کانفرنس کے دوران انہوں نے کہا کہ کچھ گروہ پروپیگنڈا اور فیک نیوز پھیلا رہے ہیں۔

انہوں نے اس بات کا بھی دعویٰ کیا کہ مریم نواز کے دور حکومت کی کوئی آڈٹ رپورٹ ابھی تک سامنے نہیں آئی۔ انہوں نے کہا کہ یوٹیوبرز نے پاک بھارت جنگ کے دوران بھی اشتعال انگیزی اور فساد پھیلانے کی کوشش کی۔ مریم نواز کے دور میں شفافیت ایک ٹریڈ مارک کی صورت میں نظر آیا ہے، جبکہ پی ٹی آئی کی پنجاب حکومت نے کسانوں کے نام پر گندم ذخیرہ کر کے پیسہ بنایا۔

(جاری ہے)

انہوں نے پنجاب میں جرائم کی شرح میں کمی کی خبر دیتے ہوئے کہا کہ لاہور میں جرائم کی شرح میں 68 فیصد کمی آئی ہے اور پنجاب کے دیگر علاقوں میں بھی جرائم میں کمی دیکھی جا رہی ہے۔ عظمیٰ بخاری کا کہنا تھا کہ چکوال، بھلوال اور حافظ آباد میں 2 دنوں کے دوران کوئی واردات نہیں ہوئی، اور پنجاب کے کئی شہروں کو بین الاقوامی سطح پر محفوظ قرار دیا گیا ہے۔

عظمیٰ بخاری نے جرائم پیشہ عناصر کے خلاف پنجاب حکومت کے اقدامات کی تفصیل دیتے ہوئے بتایا کہ پنجاب بھر سے ایک ہزار 509 اشتہاریوں کو گرفتار کیا گیا اور 614 بچوں کو ملزمان سے بازیاب کرایا گیا ہے۔ انہوں نے یہ بھی کہا کہ پنجاب میں اب کسی چور اور ڈاکو کو آزادی نہیں ہوگی۔ انہوں نے کہا کہ امن وامان برقرار رکھنا حکومت کی ذمہ داری ہے اور اس ضمن میں پنجاب حکومت کی کارروائیاں جاری رہیں گی۔

انہوں نے نئے اقدام ’سدھرا پنجاب‘ کے آغاز کا اعلان کیا اور کہا کہ سی سی ڈی (کرائم کنٹرول ڈپارٹمنٹ) کو ایف بی آئی کی طرز پر صوبائی محکمہ بنایا گیا ہے۔ سی سی ڈی نے 1500 سے زائد اشتہاریوں کو گرفتار کیا ہے اور اس کی تحقیقات کو حتمی سمجھا جاتا ہے۔ انہوں نے یہ بھی کہا کہ پنجاب حکومت نے یوم عاشورہ کے دوران سیکیورٹی کے بہترین انتظامات کیے اور مختلف مسالک کے لوگوں نے بہترین مذہبی ہم آہنگی کا مظاہرہ کیا۔ انہوں نے یہ بھی بتایا کہ گزشتہ روز ایک وفد نے وزیراعلیٰ پنجاب کے لیے امن ایوارڈ دیا۔