لله*سماج دشمن عناصر کے خلاف جنگ میں ایک ہزار سے زائد بہادر افسران اور جوان شہید ہوئے ہیں، معظم جاہ انصاری

3کوئٹہ (اُردو پوائنٹ اخبارتازہ ترین - آن لائن۔ 10 جولائی2025ء) انسپکٹر جنرل آف پولیس بلوچستان معظم جاہ انصاری نے کہا کہ سماج دشمن عناصر کے خلاف جنگ میں ایک ہزار سے زائد بہادر افسران اور جوان شہید ہوئے ہیں۔ بلوچستان پولیس جرائم پیشہ افراد کے خلاف گھیرا تنگ کرکے انہیں انصاف کے کٹہرے میں لا کھڑا کرے گی ۔بلوچستان پولیس نے غیر قانونی عناصر کے خلاف بہترین کارکردگی دکھائی ہے۔

پولیس ایک مقدس پیشہ ہے جس میں اپنے فرائض منصبی سے انصاف ضروری ہے پولیس کے جوانوں نے اپنے طرز عمل سے عوام کے دلوں میں اپنا اعتماد بحال کیا ہے۔ان خیالات کا اظہار آئی جی پولیس بلوچستان معظم جاہ انصاری نے پولیس ٹریننگ کالج کوئٹہ کی 102ویں بیج کی پاسنگ آو ٹ پریڈ کی تقریب سے خطاب کرتے ہوئے کیا ۔

(جاری ہے)

انہوں نے کہا کہ پاسنگ آو ٹ پریڈ میں شامل جوانوں کے سمارٹ ٹرن آو ٹ اور تربیت کا اعلی معیار باعث مسرت ہے۔

عوام کی جان ومال کی حفاظت کرنا ایک مقدس پیشہ ہے انہوں نے مزید کہا کہ پولیس کے جوان اپنے فرائض منصبی ایمانداری اور خلوص نیت سے ادا کریں۔ پولیس شعبے کے قیام کا مقصد معاشرے میں امن و امان اور راحت و اطمینان کو یقینی بنانا ہے۔ انہوں نے کہا کہ شرپسندوں اور جرائم پیشہ افراد کی بیخ کنی کے لیے اپنی پیشہ وارانہ صلاحیتوں کو بروئے کار لاکر صوبے کو امن کا گہوارہ بنائیں گے ۔

بلوچستان پولیس کٹھن حالات میں کام کر رہی ہے۔ موجودہ حالات میں پولیس کی اہمیت بڑھ گئی ہے ۔ اس موقع پرایڈیشنل آئی جی و کمانڈنٹ بلوچستا ن کانسٹیبلری آغا محمد یوسف ، کمانڈنٹ پولیس ٹریننگ کالج کوئٹہ شہزاد اکبر ، ڈی آئی جی ہیڈکوارٹر بلوچستان جاوید علی مہر ، ڈی آئی جی ہائی وے عبدالحئی عامر بلوچ ،ڈی آئی جی فنا نس سہیل احمد شیخ ، ڈی آئی جی ٹریننگ برکت حسین کھوسہ، ڈی آئی جی اسپیشل انیشیٹو ایاز احمد بلوچ، ڈی آئی جی کرائم بلوچستان فرحان زاہد ، ڈی آئی جی اسپیشل برانچ طاہر علاوالدین کاسی ،کمانڈنٹ اے ٹی ایف کرنل (ر) اسد فاروق، میڈیا کوارڈینٹر ٹو آئی جی پولیس رابعہ طارق اور اے آئی جیزسمیت دیگر افسران و اہلکار بھی موجود تھے۔

آئی جی پولیس بلوچستان معظم جاہ انصاری نے کہاکہ پولیس اہلکاروں نے آج یونیفارم زیب تن کرکے یہ عہد کیا ہے کہ اس کے تقدس کو کبھی پامال نہ ہونے دیںگے اور اپنے طرز عمل سے عوام کے دلوں میں اپنا اعتمادبحال کرنے میں کوئی کسر نہ چھوڑیں گے۔ قیام امن کے لئے میں پولیس کے جوانوں اور شہداکو خراج تحسین پیش کرتا ہوں۔آئی جی پولیس نے کہا کہ ماضی کی نسبت اب پولیس کی ذمہ داریا ں بڑ ھ گئی ہیں۔

بلوچستان پولیس مجرموں کو قانون کے کٹہرے میں لانے کا فریضہ بخوبی انجام دے رہی ہے۔ انہوں نے مزید کہا کہ پولیس کے جوان فر ض کی ادائیگی کے ساتھ ساتھ شہریوں کے حقوق اورعزت نفس کا احترام ملحوظ خاطر رکھیں۔ بلند اخلاق اور مثبت رویہ ہی محکمہ کی نیک نامی کا باعث ہوگا۔ان کا کہنا تھا کہ پولیس اہلکاروں کا ہتھیار ڈالنا اپنی عزت نفس کو کھونے کے مترادف ہے انہوں نے مزید کہا کہ ہتھیار پولیس کے جوان کا فخر ہے جوکہ جرائم کے خلاف ہر اول دستہ کا کردار ادا کر تے ہیں۔

انہوں نے کہا کہ آج یہاں تربیت کے معیار کودیکھ کرمیں کمانڈنٹ پی ٹی سی اوران کی ٹیم کو دِلی مبارک باد پیش کر تا ہوں۔ آئی جی پولیس بلوچستان نے کہا کہ کمانڈنٹ پی ٹی سی نے اپنے سپاس نامے میں ادارے کے جن مسائل اور ضروریات کا ذکر کیا ہے ان تما م مطالبات کو ترجیحی بنیادوں پر حل کیا جائیگا۔ آئی جی پولیس بلوچستان معظم جاہ انصاری نے کہا کہ میں تربیت کے دوران پاس ہونے والے خصوصا نمایاں کارکردگی کا مظاہرہ کرنے والوں کو مبارک باد پیش کر تا ہوں۔

میں یہ امیدکرتا ہو کہ یہ ٹریننگ پولیس ادارے کو مزید بہتر بنانے میں کارگر ثابت ہو گی آنے والے وقت میں یہ تمام تربیت یافتہ پولیس اہلکار ایک نئے جوش و جذبے کے ساتھ اپنے ادارے کیلئے ایک قیمتی اثاثہ ثابت ہوں گے۔میری دعائیں اورنیک تمنائیں آپ کے ساتھ ہیں۔اس موقع پر آئی جی پولیس بلوچستان معظم جاہ انصاری نے دوران ٹریننگ نمایاں کارکردگی کا مظاہرہ کرنے والے افسران اور جوانوں میں شیلڈ و انعامات تقسیم کیں۔