صنعتی تنازعات کے حل کیلئے ملک کے 7شہروں میں قائم کورٹس ویڈیو لنک سے منسلک

جمعرات 10 جولائی 2025 20:15

اسلام آباد/لاہور(اُردو پوائنٹ اخبارتازہ ترین - این این آئی۔ 10 جولائی2025ء)قومی کمیشن برائے صنعتی تعلقات نے صنعتی تنازعات کے حل کیلئے ملک کے 7 شہروں میں قائم کورٹس کو ویڈیو لنک سے منسلک کر دیا۔چیئرمین این آئی آر سی جسٹس (ر)شوکت عزیز صدیقی کی ہدایت پر تمام عدالتوں میں ویڈیو لنک کی سہولت فراہم کر دی گئی۔اس سے قبل مقدمات کی پیروی کیلئے ججز کے دیگر شہروں کے سفر، رہائش اور کھانے پینے پر لاکھوں روپے کے اخراجات آ رہے تھے جبکہ سائلین کو بھی کیسز کیلئے دیگر شہروں کے سفر پر ٹرانسپورٹ اور رہائش کے اضافی اخراجات برداشت کرنا پڑتے تھے۔

(جاری ہے)

پہلے مرحلے میں اسلام آباد، لاہور اور کراچی کو ویڈیو لنک سے منسلک کر کے سائلین اور وکلا کو سہولت فراہم کی گئی، دوسرے مرحلے میں سکھر، ملتان، کوئٹہ اور پشاور کو ویڈیو لنک سے منسلک کیا گیا۔اس سے قبل این آئی آر سی کے مقدمات میں وکلا ء کو کیسز کی پیروی کیلئے متعلقہ شہر جانا پڑتا تھا، اب وکلا این آئی آر سی کے کسی بھی آفس سے دیگر شہروں کی عدالتوں میں مقدمات کی پیروی کر سکتے ہیں۔اب وکلا این آئی آر سی کے مقدمات میں اپنے شہر سے ویڈیو لنک کے ذریعے دلائل دے سکیں گے، ادھر مزدوروں، ان کے نمائندوں، وکلا اور مالکان کی طرف سے بھی اس اقدام کو بے حد سراہا جا رہا ہے۔