پاکستان کی خاتون اول آصفہ بھٹو زرداری کا یوم آبادی 2025 کے موقع پر پیغام

کراچی(اُردو پوائنٹ اخبارتازہ ترین - این این آئی۔ 10 جولائی2025ء)یوم آبادی 2025کے موقع پر، پاکستان کی خاتون اول، آصفہ بھٹو زرداری نے ملک بھر میں بالخصوص خواتین، بچوں اور نوجوانوں کی صحت، وقار اور بااختیاری کے لیے قومی عزم کو نئے سرے سے مضبوط بنانے کی ضرورت پر زور دیا ہے۔خاتون اول نے کہاکہ آج کا دن ہمیں صرف اعداد و شمار ہی نہیں بلکہ ان زندگیوں اور کہانیوں کی یاد دلاتا ہے جو ان اعداد کے پیچھے چھپی ہوتی ہیںان ماں، بچوں اور خاندانوں کی جو ہماری قوم کی بنیاد ہیں۔

ہماری توجہ اس بات پر مرکوز رہنی چاہیے کہ ہر ماں صحت مند ہو، ہر بچہ محفوظ ہو، اور ہر خاندان کو ترقی کرنے کا موقع ملے۔پاکستان کو زچگی کی صحت، بچوں کی فلاح و بہبود، اور نوجوانوں کو بااختیار بنانے کے حوالے سے سنگین چیلنجز درپیش ہیں۔

(جاری ہے)

اپنے پیغام میں خاتون اول نے خاندانی منصوبہ بندی، تعلیم، سماجی تحفظ، اور تولیدی صحت کی سہولیات میں سرمایہ کاری کی فوری ضرورت پر زور دیا، جو ایک مضبوط اور جامع معاشرے کی بنیاد ہیں۔

انہوں نے کہاکہ یہ صرف ترقی کا معاملہ نہیں، بلکہ وقار، مساوات اور انصاف کا مسئلہ ہے۔ جب ہم اپنے عوام کی فلاح کو اولین ترجیح دیتے ہیں تو دراصل ہم اپنی قوم کے مستقبل کو محفوظ بناتے ہیں۔انہوں نے کہاکہ یوم آبادی 2025 کا تھیم ہے کہ نوجوانوں کو بااختیار بنانا کہ وہ ایک منصفانہ اور پرامید دنیا میں وہ خاندان تشکیل دیں جو وہ چاہتے ہیں،۔یہ موضوع پاکستان کے تناظر میں خاص اہمیت رکھتا ہے، جہاں آبادی کا ایک بڑا حصہ تیس سال سے کم عمر نوجوانوں پر مشتمل ہے۔

خاتون اول نے اس بات پر زور دیا کہ نوجوانوں کو باعزت زندگی گزارنے کے مواقع میسر ہونے چاہئیں، جو امتیاز سے پاک ہو، اور جہاں وہ باخبر فیصلے کرنے کے قابل ہوں۔انہوں نے کہاکہ ہمارے نوجوان صرف ہمارا مستقبل نہیں، بلکہ ہمارا حال بھی ہیں۔ ہمیں یہ یقینی بنانا ہوگا کہ انہیں معیاری تعلیم، مکمل طبی سہولیات، معاشی مواقع اور اپنی زندگیوں سے متعلق فیصلوں میں شراکت داری حاصل ہو۔

ان کو بااختیار بنانا ایک منصفانہ، پرامن اور پائیدار پاکستان کی تعمیر کے لیے ناگزیر ہے۔یوم آبادی کے موقع پر، خاتون اول نے تمام پاکستانیوں کے حقوق اور فلاح کے فروغ کے لیے اپنے عزم کو دہرایا اور حکومت، سول سوسائٹی اور نجی شعبے کے تمام شراکت داروں سے اپیل کی کہ وہ مل کر ایک ایسے مستقبل کے لیے کام کریں جہاں ہر زندگی کی قدر ہو اور ہر نسل بااختیار ہو۔انہوں نے بے نظیر بھٹو شہید کے 1994 کے قاہرہ میں منعقدہ بین الاقوامی آبادی و ترقی کانفرنس میں کہے گئے تاریخی الفاظ کی یاد بھی دلائی۔میرا خواب ہے ایک ایسا پاکستان، ایک ایسی ایشیا، ایک ایسی دنیا جہاں ہر حمل منصوبہ بند ہو، اور ہر پیدا ہونے والے بچے کی پرورش، محبت، تعلیم اور سرپرستی ہو۔