لاہور ، معروف شاپنگ پلازہ حفیظ سینٹر میں لگنے والی آگ پر قابو پا لیا گیا

جمعرات 10 جولائی 2025 21:10

لاہور (اُردو پوائنٹ اخبارتازہ ترین - اے پی پی۔ 10 جولائی2025ء) لاہور کے علاقے گلبرگ کے معروف شاپنگ پلازہ حفیظ سینٹر میں لگنے والی آگ پر قابو پا لیا گیا۔ریسکیو کی5 فائرفائٹرز گاڑیوں نے حفیظ سینٹر میں لگی آگ پر قابو پا لیا، حفیظ سینٹر میں بارشی پانی کے باعث شارٹ سرکٹ کا انکشاف ہوا ہے۔عینی شاہدین کے مطابق آگ حفیظ سینٹر کی بیسمنٹ میں لگی جس سے پہلے بیسمنٹ میں دھماکوں کی آوازیں آئیں، بیسمنٹ میں کھڑی گاڑیاں اور موٹرسائیکلیں بھی آگ کی لپیٹ میں آئیں۔

ریسکیو حکام کے مطابق آگ کی لپیٹ میں بیسمنٹ خاص طور پر متاثر ہوئی ہے جہاں دھواں بھر گیا، ابھی تک کسی جانی نقصان کی اطلاع موصول نہیں ہوئی۔ڈی آئی جی آپریشنز کی ہدایت پر پولیس بھی موقع پر موجود اور ایس ایچ او گلبرگ کو ہجوم کنٹرول کرنے اور موقع پر رہنے کے سخت احکامات دیئے گئے ہیں تاکہ صورتحال پر قابو پایا جا سکے۔

(جاری ہے)

ڈی آئی جی آپریشنز نے پولیس کو ہدایت کی ہے کہ وہ ریسکیو اور دیگر ہنگامی اداروں کی مکمل معاونت کریں اور غیر متعلقہ افراد کو آگ لگنے والے مقام سے دور رکھیں۔دریں اثناء پولیس کو متعلقہ جگہ کو سیل کر کے عوام کی محفوظ آمد و رفت یقینی بنانے کا بھی حکم دیا گیا ہے۔ ڈی آئی جی آپریشنز نے تمام متعلقہ افسران کو فوری طور پر موقع پر پہنچنے کی ہدایت بھی جاری کی ہے۔