بھارتی میڈیا نے کرکٹ کے بعد پاکستان ہاکی ٹیم کو بھی نشانے پر رکھ لیا

پاکستانی ہاکی اولمپئینز نے سکیورٹی خدشے کے پیش نظر ایشیاء کپ بھارت سے کسی دوسرے ملک منتقل کرنے کا مطالبہ کردیا

ذیشان مہتاب جمعہ 11 جولائی 2025 12:54

بھارتی میڈیا نے کرکٹ کے بعد پاکستان ہاکی ٹیم کو بھی نشانے پر رکھ لیا

نئی دہلی (اردو پوائنٹ تازہ ترین اخبار ۔ 11 جولائی 2025ء ) بھارت کی کھیلوں سے دشمنی بڑھنے لگی، کرکٹ کے بعد اب ہاکی پر بھی وار کیے جارہے ہیں۔

اس حوالے سے ایک طرف بھارتی میڈیا پاکستان کے خلاف زہر اگل رہا ہے تو دوسری طرف بھارت کی انتہا پسند تنظیم آر ایس ایس کے مختلف سوشل میڈیا اکاؤنٹس سے بھی پاکستان ہاکی ٹیم کو کھلم کھلا دھمکیاں دی جارہی ہیں۔

بھارت میں سوشل میڈیا پر تصاویر لگا کر پاکستان ہاکی ٹیم کے کھلاڑیوں کو دھمکایا جارہا ہے۔

(جاری ہے)

اس سے قبل خود بھارتی میڈیا نے خبریں دی تھیں کہ بھارتی حکومت نے پاکستان ہاکی ٹیم کو بھارت آنے کی اجازت دے دی ہے تاہم 2 دن گزرنے کے بعد بھارتی میڈیا نے زہر اگلنا شروع کردیا۔

موجودہ صورتحال میں پاکستان کے ہاکی اولمپئنز نے ایشیا کپ بھارت سے کسی دوسرے ملک منتقل کرنے کا مطالبہ کردیا ہے۔

پاکستانی ہاکی اولمپئنز کا کہنا ہے کہ کرکٹ کی طرح ہاکی کے مقابلے بھی نیوٹرل مقام پر ہونے چاہئیں۔

واضح رہے کہ ایشیا کپ ہاکی 27 اگست سے بھارت کے شہر راجگیر میں شیڈول ہے۔