Live Updates

سابق بھارتی جنرل کا پاکستان کیخلاف آبی دہشتگری کا انکشاف، شاہد آفریدی کا ردِ عمل سامنے آگیا

پانی زندگی کا سرچشمہ ، اسے ہتھیارکے طور پر استعمال کرنا یا اس بارے میں سوچنا بھی غیر انسانی اور انتہا پسندانہ رویہ ہے : سابق کپتان

ذیشان مہتاب بدھ 3 ستمبر 2025 11:00

سابق بھارتی جنرل کا پاکستان کیخلاف آبی دہشتگری کا انکشاف، شاہد آفریدی ..

لاہور (اردو پوائنٹ تازہ ترین اخبار ۔ 3 ستمبر 2025ء ) پاکستان کیخلاف آبی دہشت گردی کے منصوبے سے متعلق سابق بھارتی جنرل کی ویڈیو پر سابق کپتان قومی کرکٹ ٹیم شاہد آفریدی کا ردعمل سامنے آگیا۔

سوشل میڈیا پر وائرل ایک ویڈیو میں بھارتی فوج کا ریٹائرڈ لیفٹیننٹ جنرل کنول جیت سنگھ ڈھلوں پانی کو بطور ہتھیار استعمال کرکے پاکستان کو تباہ کرنےکا منصوبہ بتا رہا ہے۔

ایک انٹرویو میں ریٹائرڈ لیفٹیننٹ جنرل کنول جیت سنگھ ڈھلوں نے پاکستان کے خلاف آبی دہشت گردی کا منصوبہ بتاتے ہوئے کہا کہ ہمارے پاس پانی روکنےکی جتنی صلاحیت ہے وہ ہم روکیں گے اور ایک دن رات کو اچانک پانی پاکستان کی جانب چھوڑ دیں گے اور ایک حد سے زیادہ پاکستان کے پاس پانی روکنے اور جمع کرنے کی صلاحیت نہیں جس سے وہاں سیلاب آئے گا اور پاکستان اس پانی کا ٹھیک استعمال بھی نہیں کرسکےگا۔

(جاری ہے)

کنول جیت سنگھ ڈھلوں کا کہنا تھا کہ اسی طرح ہم دوبارہ پانی کو روک لیں گے، خاص طور پر گرمیوں میں جب فصلوں کو پانی کی ضرورت ہوتی ہے اس وقت پانی روک لیں گے اور بارشوں کے موسم میں جب پانی کی ضرورت نہیں اس وقت پانی چھوڑدیں گے، اس طرح پانی کو ہم ہتھیار کے طور پر استعمال کرسکیں گے۔

سابق بھارتی جنرل کے بیان پر ردعمل دیتے ہوئے شاہد آفریدی کا کہنا تھا کہ پانی زندگی کا سرچشمہ ہے، اسے ہتھیارکے طور پر استعمال کرنا یا اس بارے میں سوچنا بھی غیر انسانی اور انتہا پسندانہ رویہ ہے۔

شاہد آفریدی کا کہنا تھا کہ موسمی تبدیلیوں کے بڑھتے اثرات ہر سال تباہی کی شدت کو بڑھا رہے ہیں، وقت آگیا ہےکہ ارباب اختیار ہر سیاسی اختلاف سے بالا تر ہو کر قومی مفاد میں فیصلے کریں۔

سابق کپتان کا کہنا تھا کہ ڈیمز کی تعمیر اور پانی کے تحفظ سمیت ماحولیاتی استحکام کے لیے فوری اور ٹھوس اقدامات ناگزیر ہیں، اگر ہم نے آج متفقہ حکمت عملی نہ اپنائی تو آنے والے سالوں میں یہ تباہی ہمارے بس سے باہر ہو جائےگی۔ آئیں، مل کر پانی اور زندگی کو بچائیں ۔

پانی زندگی کا سرچشمہ ہے اسے ہتھیار کے طور پر استعمال کرنا یا اس بارے میں سوچنا بھی غیر انسانی اور انتہا پسندانہ رویہ ہے۔ موسمی تبدیلیوں کے بڑھتے اثرات ہر سال تباہی کی شدت کو بڑھا رہے ہیں وقت آگیا ہے کہ اربابِ اختیار ہر سیاسی اختلاف سے بالا تر ہو کر قومی مفاد میں فیصلے کریں۔ ڈیمز… https://t.co/tl8lH5tfg4
— Shahid Afridi (@SAfridiOfficial) September 1, 2025