پاکستان سٹاک ایکسچینج میں سرمایہ کاروں کا اعتماد بحال، جمعہ کوزبردست تیزی

جمعہ 11 جولائی 2025 13:44

اسلام آباد (اُردو پوائنٹ اخبارتازہ ترین - اے پی پی۔ 11 جولائی2025ء) پاکستان سٹاک ایکسچینج میں سرمایہ کاروں کا اعتماد بحال، مارکیٹ میں جمعہ کوزبردست تیزی دیکھنے میں آئی۔ 100 انڈیکس میں 742 پوائنٹس کا نمایاں اضافہ ریکارڈ کیا گیا، جس کے بعد انڈیکس 1 لاکھ 34 ہزار 525 پوائنٹس کی سطح پر پہنچ گیا۔ماہرین معیشت کے مطابق حکومتی اقتصادی پالیسیوں اور سرمایہ کاروں کے مثبت رجحان کے باعث مارکیٹ میں تیزی کا رجحان دیکھا گیا۔

(جاری ہے)

کاروباری حلقوں نے اسٹاک مارکیٹ کی اس کارکردگی کو معیشت کے لیے مثبت اشارہ قرار دیتے ہوئے توقع ظاہر کی ہے کہ آئندہ دنوں میں بھی مارکیٹ میں بہتری کا سلسلہ جاری رہے گا۔پاکستان اسٹاک ایکسچینج میں مسلسل بہتری سے نہ صرف سرمایہ کاروں کے اعتماد میں اضافہ ہوا ہے بلکہ ملکی اور غیرملکی سرمایہ کاروں کی دلچسپی میں بھی اضافہ ہو رہا ہے۔دوسری جانب انٹربینک میں امریکی ڈالر کی قیمت میں 31 پیسے کی کمی ریکارڈ کی گئی، جس کے بعد ڈالر 284 روپے 25 پیسے پر آ گیا۔ماہرین معاشیات کا کہنا ہے کہ ڈالر کی قیمت میں کمی سے درآمدی اخراجات میں کمی اور مہنگائی پر دباؤ کم ہونے کی امید ہے، جو معیشت کے لیے مثبت اشارہ ہے۔