عالمی یوم آبادی کی مناسبت پر معاون خصوصی ملک لیاقت خان کا اہم پیغام

جمعہ 11 جولائی 2025 18:32

پشاور(اُردو پوائنٹ اخبارتازہ ترین - این این آئی۔ 11 جولائی2025ء)خیبر پختونخوا کے وزیر اعلیٰ کے معاونِ خصوصی برائے بہبود آبادی ملک لیاقت خان نے ورلڈ پاپولیشن ڈے کے موقع پر عوام کو ایک اہم پیغام جاری کرتے ہوئے کہا ہے کہ بڑھتی ہوئی آبادی نہ صرف ملکی وسائل پر دباؤ ڈال رہی ہے بلکہ عالمی سطح پر ماحولیاتی تبدیلیوں (Climate Change)، گلوبل وارمنگ، اور دیگر سنگین سماجی و معاشی مسائل کو بھی جنم دے رہی ہے۔

اس عالمی دن کے موقع پر انہوں نے عوام الناس سے خاندانی منصوبہ بندی (Family Planning) کو سنجیدگی سے اپنانے اور اس پر عملدرآمد کرنے کی پرزور اپیل کی ہے۔ملک لیاقت خان نے کہا کہ‘‘ایک منظم، صحت مند اور خوشحال معاشرے کے لیے ضروری ہے کہ ہم آبادی میں غیر معمولی اضافے پر قابو پائیں۔

(جاری ہے)

بدقسمتی سے پاکستان دنیا کے ان ممالک میں شامل ہے جہاں آبادی میں تیزی سے اضافہ ہو رہا ہے، جو نہ صرف تعلیمی، صحت، روزگار اور رہائش جیسے بنیادی شعبہ جات پر منفی اثر ڈال رہا ہے بلکہ قدرتی وسائل میں کمی اور ماحولیاتی مسائل کا بھی سبب بن رہا ہے۔

’’انہوں نے مزید کہا کہ حکومت خیبر پختونخوا محکمہ بہبود آبادی کے ذریعے مختلف آگاہی مہمات، مفت طبی سہولیات، اور مشاورت کی سہولتیں فراہم کر رہی ہے تاکہ ہر گھرانے کو اپنے بہتر مستقبل کی بنیاد رکھنے میں مدد دی جا سکے۔ انہوں نے علمائے کرام، میڈیا، اساتذہ اور سول سوسائٹی سے بھی اپیل کی کہ وہ خاندانی منصوبہ بندی سے متعلق شعور اجاگر کرنے میں اپنا بھرپور کردار ادا کریں۔

ملک لیاقت خان نے کہا کہ‘‘ہمیں چاہیے کہ ہم اپنے بچوں کو ایک ایسا ماحول مہیا کریں جہاں انہیں تعلیم، صحت اور روزگار کے بہتر مواقع میسر ہوں۔ یہ اُسی وقت ممکن ہے جب ہم آبادی پر کنٹرول حاصل کریں گے۔’’ورلڈ پاپولیشن ڈے کا پیغام صرف ایک دن تک محدود نہیں ہونا چاہیے بلکہ اسے ایک مسلسل کوشش اور طرزِ فکر میں بدلنا ہوگا تاکہ ہم ایک پائیدار اور خوشحال پاکستان کی طرف گامزن ہو سکیں۔