مخصوص نشستوں پر ممبران سے حلف ،(ن )لیگ نے پشاور ہائیکورٹ میں درخواست دائر کردی

چیف جسٹس ممبران سے حلف لینے کیلئے کسی کو بھی نامزد کرسکتا ہے، درخواست میں موقف

جمعہ 11 جولائی 2025 21:15

پشاور (اُردو پوائنٹ اخبارتازہ ترین - این این آئی۔ 11 جولائی2025ء)مسلم لیگ (ن) نے مخصوص نشستوں پر منتخب اقلیت اور خواتین ممبران سے حلف لینے کے لیے پشاور ہائیکورٹ میں درخواست دائر کر دی۔رحمان اللہ شاہ ایڈووکیٹ کی وساطت سے دائر درخواست میں الیکشن کمیشن اور اسپیکر صوبائی اسمبلی کو فریق بنایا گیا ہے۔

(جاری ہے)

درخواست کے مطابق سپریم کورٹ آئینی بینچ فیصلے کے بعد خیبر پختونخوا اسمبلی کے مخصوص نشستوں پر منتخب ممبران کو بحال کیا گیا، 2 جولائی کو الیکشن کمیشن نے ممبران کی بحالی کا نوٹیفکیشن جاری کیا اور درخواست گزاروں نے اسپیکر صوبائی اسمبلی کو حلف کے لیے درخواست دی، سیکرٹری اسپیکر صوبائی اسمبلی نے کہا کہ جب اسمبلی اجلاس ہوگا تو ان سے حلف لیا جائے گا۔

درخواست میں موقف اپنایا گیا ہے کہ 26ویں آئینی ترمیم کے آرٹیکل 255(2)کے تحت چیف جسٹس کو اختیار دیا گیا ہے اور چیف جسٹس کسی کو بھی نامزد کر سکتا ہے کہ وہ ممبران سے حلف لے لیں، 21 جولائی کو خیبر پختونخوا میں سینیٹ الیکشن شیڈول ہے لہذا سینیٹ الیکشن سے پہلے ممبران سے حلف لیا جائے، ممبران سے حلف لیا جائے تاکہ وہ سینیٹ الیکشن میں ووٹ کاسٹ کر سکے۔درخواست جلد سماعت کے لیے مقرر کرنے کی استدعا بھی کی گئی ہے۔