نوجوان قومی ترقی میں اہم کردار ادا کر سکتے ہیں،اسرار احمد انجم

ہفتہ 12 جولائی 2025 16:39

قصور (اُردو پوائنٹ اخبارتازہ ترین - اے پی پی۔ 12 جولائی2025ء) عالمی یوم آبادی کے موقع پر محکمہ صحت وآبادی کے زیراہتمام سیمینار کا انعقادکیاگیا۔ سیمینار میں ضلعی آفیسر بہبود آباد اسرار احمد انجم، ڈپٹی ڈسٹرکٹ پاپولیشن ویلفیئر آفیسر میڈم سمیرا دلاور، ڈپٹی ٹیکنیکل ڈاکٹر ماہ نور، ڈپٹی ڈائریکٹر ڈی ایچ ڈی سی میڈم فوزیہ اور خواتین وحضرات کی کثیر تعداد نے شرکت کی۔

اس موقع پر شرکاء نے بااختیار نوجوان، متوازن خاندان، ترقی کی راہ پر پاکستان کے موضوع پر روشنی ڈالتے ہوئے کہاکہ ہمیں اپنے نوجوانوں کو خاندانی منصوبہ بندی، صنفی مساوات، تعلیم وصحت اور صاف ماحول تک رسائی دینی ہوگی تاکہ وہ ایک متوازن خاندان کے ذریعے اپنی اور ملک کی فلاح وبہبود کو یقینی بناسکیں۔

(جاری ہے)

پاکستان کی آبادی میں 1950ء سے اب تک سات گنا اضافہ ہو چکا ہے، اور آبادی میں مسلسل اضافے کے ساتھ ملکی وسائل پر بھی دباؤ بڑھتا جا رہا ہے۔

ملکی ترقی کی راہ ہمواہ کرنے کیلئے نوجوانوں کو زیادہ سے زیادہ کمیونٹی پروگرامز میں شامل کرکے بڑھتی ہوئی آبادی واثرات کے بارے میں آگاہی فراہم کی جائے تاکہ تیزی سے بڑھتی ہوئی آبادی کو کنٹرول کرکے عوام الناس کی سمت کو ایک متوازن معاشرہ کی جانب مبذوال کروایا جاسکے۔ شرکاء کا مزید کہنا تھا کہ ملک کی نصف سے زائد آبادی نوجوانوں پر مشتمل ہے، جو قومی ترقی میں اہم کردار ادا کر سکتے ہیں۔

انہوں نے نوجوانوں کو اس سلسلے میں آگے بڑھنے کی دعوت دی تاکہ ملک کی مستقبل کی سمت کو بہتر بنایا جا سکے۔سیاسی جماعتوں، پارلیمنٹیرینز اور میڈیا کا فعال کردار نہایت اہمیت رکھتا ہے۔ انہوں نے اس امر پر زور دیا کہ سوشل میڈیا سمیت تمام پلیٹ فارمز پر اس قومی موضوع پر بات ہونی چاہیے تاکہ عوام میں شعور بیدار ہو۔\378