کراچی کی دو بڑی جامعات کے قریب منشیات فروشی عروج پر، پولیس خاموش تماشائی

یونیورسٹیوں کے قریب خانہ بدوش خواتین اور دیگر افراد سرِعام منشیات فروخت کر رہے ہیں،علاقہ مکین شدید پریشان

ہفتہ 12 جولائی 2025 20:40

کراچی(اُردو پوائنٹ اخبارتازہ ترین - این این آئی۔ 12 جولائی2025ء)کراچی شہر کی معروف جامعات، جامعہ کراچی اور این ای ڈی یونیورسٹی کے اطراف منشیات فروشی کا غیرقانونی کاروبار عروج پر پہنچ چکا ہے۔ علاقے میں کھلے عام نشہ آور اشیا کی فروخت جاری ہے جبکہ پولیس مکمل طور پر خاموش تماشائی بنی ہوئی ہے۔ منشیات فروشوں کی سرگرمیوں سے علاقہ مکین شدید پریشان ہیں اور متعدد بار شکایات کے باوجود موثر کارروائی نہ ہونے پر تشویش کا اظہار کر رہے ہیں۔

(جاری ہے)

علاقہ مکینوں کے مطابق یونیورسٹیوں کے قریب خانہ بدوش خواتین اور دیگر افراد سرِعام منشیات فروخت کر رہے ہیں۔ انہوں نے کہاکہ بارہا شکایات کے باوجود قانون نافذ کرنے والے ادارے کوئی کارروائی نہیں کر رہے۔منشیات فروشوں کی موجودگی سے طلبہ، اساتذہ اور عام شہریوں میں شدید بے چینی پائی جاتی ہے، جبکہ علاقے میں جرائم کی شرح میں بھی اضافہ دیکھنے میں آیا ہے۔علاقہ مکینوں نے حکومتِ سندھ، آئی جی سندھ اور دیگر اعلی حکام سے مطالبہ کیا ہے کہ فوری کارروائی کر کے منشیات فروشوں کے خلاف کریک ڈان کیا جائے اور تعلیمی اداروں کے ماحول کو محفوظ بنایا جائے۔