بھارتی آبی جارحیت سے نمٹنے کیلئے تمام صوبوں کی مشاورت سے قومی پالیسی بنائیں گے، احسن اقبال

اتوار 13 جولائی 2025 16:00

لاہور(اُردو پوائنٹ اخبارتازہ ترین - این این آئی۔ 13 جولائی2025ء) وفاقی حکومت نے بھارتی آبی جارحیت کے خلاف مضبوط حکمت عملی کے لیے خصوصی کمیٹی تشکیل دینے کا فیصلہ کیا ہے ۔وفاقی وزیر منصوبہ بندی ، ترقی و خصوصی اقدامات احسن اقبال کے مطابق پلاننگ کمیشن کی سربراہی میں انجینئرز پر مشتمل خصوصی کمیٹی تشکیل دی جائے گی۔کمیٹی میں انسٹیٹیوٹ آف انجینئرز پاکستان ، پاکستان انجینئرنگ کانگرس، پاکستان انجینئرنگ کونسل اور دی انسٹیٹیوٹ آف الیکٹریکل اینڈ الیکٹرانکس انجینئرز آف پاکستان اور دیگر نمائندے شامل ہوں گے۔

انجینئرز کے وفد سے ملاقات میں احسن اقبال نے انجینئرز کے لیے لاہور میں قائم انجینئرز لانج کا افتتاح کیا۔وفاقی وزیر احسن اقبال نے کہا کہ فیڈریشن آف انجینئرنگ انسٹیٹیوشن آف پاکستان بھی تشکیل دی جائے گی جبکہ تمام صوبوں کی مشاورت سے بھارتی آبی جارحیت سے نمٹنے کے لیے قومی پالیسی مرتب کریں گے۔

(جاری ہے)

انہوں نے کہا کہ چاروں صوبوں کے انجینئرز پر مشتمل کمیٹی تکنیکی مسائل کو حل کرنے کے لیے تجاویز دے گی اور صوبوں کے درمیان ہونے والے تکنیکی مسائل کو سیاسی بنیادوں پر نہیں تکنیکی بنیادوں پر حل کیا جائے گا۔

سیکرٹری جنرل آئی ای پی انجینئر امیر ضمیر خان نے کہا کہ سیاست دانوں کو صوبائی جھگڑوں سے باہر نکلنا ہو گا، تمام انجینئرز باڈیز پلاننگ کمیشن کی چھت تلے کردار ادا کرنے کے لیے تیار ہیں۔انہوں نے کہا کہ آبی جارحیت کا مقابلہ کرنے کے لیے لاکھوں انجینئرز حکومت کے ساتھ ہیں۔