نکاٹی کاایف بی آر کے حالیہ اقدامات پر تشویش کا اظہار

فیصل معیز خان کا نے 19 جولائی کو کراچی چیمبر آف کامرس کی کال کی حمایت کر دی

اتوار 13 جولائی 2025 17:50

کراچی(اُردو پوائنٹ اخبارتازہ ترین - این این آئی۔ 13 جولائی2025ء)نارتھ کراچی ایسوسی ایشن آف ٹریڈ اینڈ انڈسٹری(نکاٹی)کے صدر فیصل معیز خان نے فیڈرل بورڈ آف ریونیو(ایف بی آر)کی جانب سے صنعتکاروں کے خلاف حالیہ سخت اور غیر دانشمندانہ اقدامات پر شدید تحفظات کا اظہار کیا ہے۔ انہوں نے کراچی چیمبر آف کامرس اینڈ انڈسٹری کی 19 جولائی 2025 کو مجوزہ کال کی بھرپور حمایت کرتے ہوئے کہا کہ صنعتکاروں کو غیر ضروری نوٹسز، بینک اکانٹس کی ضبطگی اور بے جا ہراسانی معیشت کو مزید بحران کی طرف دھکیل سکتی ہے۔

فیصل معیز خان نے کہا کہ صرف نارتھ کراچی صنعتی زون میں 4500 سے زائد صنعتی یونٹس موجود ہیں جو سالانہ اربوں روپے کا ٹیکس قومی خزانے میں جمع کرواتے ہیں اور لاکھوں افراد کو روزگار فراہم کرتے ہیں۔

(جاری ہے)

ایف بی آر کے اقدامات سے نہ صرف صنعتی پہیہ متاثر ہو رہا ہے بلکہ برآمدات، سرمایہ کاری اور روزگار کے مواقع بھی شدید خطرے سے دوچار ہو رہے ہیں۔انہوں نے مزید کہا کہ حالیہ دنوں میں ایف بی آر کی جانب سے سینکڑوں صنعتی اداروں کو بلاجواز نوٹسز بھیجے گئے ہیں، جن میں ایسے ادارے بھی شامل ہیں جو نہ صرف ریگولر فائلرز ہیں بلکہ باقاعدگی سے ٹیکس ادا کر رہے ہیں۔

نکاٹی کے مطابق، جولائی کے پہلے دس دنوں میں کم از کم 1600 کمپنیوں کو آڈٹ یا ریکوری کے نوٹس موصول ہوئے ہیں، جس سے بزنس کمیونٹی میں شدید بے چینی پائی جاتی ہے۔صدرنکاٹی نے وزیر اعظم، وزیر خزانہ اور چیئرمین ایف بی آر سے اپیل کی ہے کہ وہ موجودہ بحران کا فوری نوٹس لیں اور صنعتکاروں سے مشاورت کے بغیر کسی بھی قسم کی پالیسی کا اطلاق نہ کیا جائے۔

انہوں نے واضح کیا کہ کراچی چیمبرکی 19 جولائی کی حکمت عملی ایک اجتماعی آواز بن چکی ہے جس کا مقصد کاروباری ماحول کو بہتر بنانا اور بے جا ٹیکس پالیسیوں کے خلاف پرامن مقف اپنانا ہے۔ فیصل معیز نے تمام صنعتی زونز اور ایسوسی ایشنز سے اپیل کی کہ وہ اس دن اپنی یکجہتی کا مظاہرہ کریں۔فیصل معیز خان نے چیف آف آرمی اسٹاف، جنرل عاصم منیر سے بھی اپیل کی ہے کہ وہ اقوام متحدہ اور عالمی فورمز پر کیے گئے اپنے وعدوں کے مطابق ملکی معیشت کے تحفظ کے لیے فوری مداخلت کریں تاکہ پاکستان میں صنعت و تجارت کا پہیہ رواں رہے اور سرمایہ کاروں کا اعتماد بحال ہو۔