حکومت کا ایف سی کو ملک گیر فیڈرل فورس بنانے کا فیصلہ

فیڈرل کانسٹیبلری کے قیام سے ملکی داخلی سلامتی اور امن او عامہ کے قیام میں خاطر خواہ مدد ملے گی

ساجد علی اتوار 13 جولائی 2025 18:50

حکومت کا ایف سی کو ملک گیر فیڈرل فورس بنانے کا فیصلہ

اسلام آباد ( اُردو پوائنٹ اخبارتازہ ترین۔ 13 جولائی 2025ء ) وفاقی حکومت نے فرنٹیئر کانسٹیبلری کو ملک گیر فیڈرل فورس میں تبدیل کرنے کا فیصلہ کرلیا۔ میڈیا رپورٹس کے مطابق وفاقی حکومت کی جانب سے فرنٹیئر کانسٹیبلری (ایف سی) کو ملک گیر وفاقی فورس میں توسیع دینے کا فیصلہ کیا گیا ہے اس فیصلے پر عمل درآمد کے لیے وفاقی کابینہ کی طرف سے فرنٹیئر کانسٹیبلری ایکٹ 1915ء میں ترامیم کی منظوری کے بعد پورے پاکستان میں ایف سی کے دائرہ اختیار کو بڑھانے کے لیے ایک آرڈیننس جاری کیا جائے گا۔

ذرائع کا حوالہ دیتے ہوئے بتایا گیا ہے کہ اس فورس کا نام بدل کر فیڈرل کانسٹیبلری رکھا جائے گا، جس کو چاروں صوبوں، اسلام آباد، آزاد جموں و کشمیر اور گلگت بلتستان میں کام کرنے کا اختیار دیا جائے گا، آرڈیننس کے نفاذ کے بعد اس نئی فورس کے لیے ملک بھر میں بھرتیاں بھی کی جائیں گی۔

(جاری ہے)

اس سلسلے میں مزید یہ بھی معلوم ہوا ہے کہ نئی فورس کے ملک بھر میں دفاتر قائم کیے جائیں گے، تنظیم نو فریم ورک کے تحت، فیڈرل کانسٹیبلری کی کمانڈ پولیس سروس آف پاکستان کے افسران کریں گے، فیڈرل کانسٹیبلری کے قیام سے ملکی داخلی سلامتی اور امن او عامہ کے قیام میں خاطر خواہ مدد ملے گی، اس اقدام کو قومی سطح پر داخلی سلامتی کے طریقہ کار کو مضبوط اور مرکزی بنانے کی وسیع تر کوششوں کا حصہ قرار دیا جا رہا ہے۔