محسن نقوی کی ایرانی ہم منصب سے ملاقات، دوطرفہ تعلقات پر تبادلہ خیال کیا

وزیرداخلہ کاایرانی سپریم لیڈر آیت اللہ خامنہ ای اور صدر مسعود پزشکیان کیلئے نیک خواہشات کا اظہار

اتوار 13 جولائی 2025 22:20

تہران(اُردو پوائنٹ اخبارتازہ ترین - این این آئی۔ 13 جولائی2025ء)وفاقی وزیرداخلہ محسن نقوی نے ایران کے سرکاری دورے کے پہلے روز ایرانی ہم منصب سے ملاقات کی اور دوطرفہ تعلقات پر تبادلہ خیال کیا گیا ۔اتوارکو وفاقی وزیرداخلہ محسن نقوی نے تہران میں ایرانی ہم منصب اسکندر مومنی سے ملاقات کی، جس میں باہمی دلچسپی کے امور اور پاک-ایران تعلقات پر تبادلہ خیال کیا گیا۔

ایرانی وزیرداخلہ نے کہا کہ اپنے بھائی کو ایران آمد پر دل کی اتھاہ گہرائیوں سے خوش آمدید کہتے ہیں، یقینا آپ کا دورہ پاک-ایران تعلقات کے فروغ میں معاون ثابت ہو گا۔اس موقع پر وزیر داخلہ محسن نقوی نے کہاکہ ایران ہمارا برادر ہمسایہ ملک ہے، دوطرفہ تعلقات کو خصوصی اہمیت دیتے ہیں، امید ہے کہ پاکستان، ایران اور عراق سہ ملکی کانفرنس سے زائرین کے مسائل حل کرنے میں مدد ملے گی۔

(جاری ہے)

محسن نقوی نے ایران کے سپریم لیڈر آیت اللہ خامنہ ای اور صدر مسعود پزشکیان کیلئے نیک خواہشات کا اظہار کیا۔رپورٹ کے مطابق وفاقی وزیرداخلہ محسن نقوی تہران میں زائرین اور سرحدی مسائل منعقد ہونے والی سہ ملکی کانفرنس میں شرکت کریں گے، کانفرنس میں ایران اور عراق کے وزرائے داخلہ بھی شریک ہوں گے۔تہران میں زائرین، بارڈر اور دیگر متعلقہ مسائل کے حل کیلئے پاکستان کی درخواست پر سہ ملکی کانفرنس کا انعقاد ہو رہا ہے۔وفاقی وزیرداخلہ محسن نقوی اس دورے میں ایران کے صدر مسعود پزشکیان سے بھی ملاقات کریں گے۔