گورنر خیبر پختونخوا کا کھیلوں کے فروغ اور نوجوانوں کی ترقی کیلئے بڑے اقدامات کا اعلان

منگل 15 جولائی 2025 16:15

اسلام آباد (اُردو پوائنٹ اخبارتازہ ترین - این این آئی۔ 15 جولائی2025ء)گورنر خیبر پختونخوا فیصل کریم کنڈی نے صوبے بھر میں کھیلوں کے فروغ اور نوجوانوں کو بااختیار بنانے کیلئے متعدد نئے اقدامات کا اعلان کر دیا ہے جس کے تحت گورنر کے پی اسپورٹس ایوارڈز‘‘ سمیت ’’اڈاپٹ اے پلیئر‘‘ کے نام سے نئی موبائل ایپلی کیشن کا اجرا شامل ہے۔ گورنر ہاؤس پشاور میں راولپنڈی اسلام آباد اسپورٹس جرنلسٹس ایسوسی ایشن (رسجا) کے صدر ابوبکر بن طلعت کی قیادت میں ملنے والے وفد سے گفتگو کرتے ہوئے فیصل کریم کنڈی نے کہا کہ قومی اور بین الاقوامی سطح پر کامیابی حاصل کرنے والے خیبر پختونخوا کے کھلاڑیوں کو اعزازات دینے اورانکی حوصلہ افزائی کیلئے پہلے گورنر کے پی اسپورٹس ایوارڈز کا انعقاد کیا جائے گا جبکہ اڈاپٹ اے پلیئر‘ موبائل ایپ بھی متعارف کروائی جائے گی جس کا مقصد ابھرتے ہوئے کھلاڑیوں کو سپانسرز اور معاونین سے جوڑنا ہے۔

(جاری ہے)

انہوں نے کہا کہ خیبر پختونخوا میں پروفیشنل کرکٹ اور فٹبال لیگ کے اجراء کی تیاریوں جاری ہیں تاکہ نوجوان ٹیلنٹ کو پلیٹ فارم پر اپنی صلاحیتوں کا جوہر دکھانے کا موقع مل سکے۔ملاقات کے دوران گورنرخیبر پختونخوا نے پشاور کے ارباب نیاز کرکٹ اسٹیڈیم کی تعمیرکی تکمیل میں غیر معمولی تاخیر پر شدید تشویش کا اظہار کرتے ہوئے کہاکہ طویل عرصہ گزرنے کے باوجود ترقیاتی کام مکمل نہیں ہو سکا، جس کے باعث صوبے کے کرکٹ شائقین جدید سہولیات سے محروم ہیں۔

انہوںنے کہاکہ پاکستان کرکٹ بورڈ نے لاہور کراچی اور راولپنڈی کے کرکٹ سٹیڈیمز بہت کم وقت میں ڈیویلپ کیے۔ نہوںنے کہاکہ صوبائی حکومت کو بھی کرکٹ بورڈسے سیکھنا ارباب اسٹیڈیم کی تکمیل کیلئے کرکٹ بورڈ سے سیکھنا چاہیے۔ ملاقات میں رسجا وفد نے کھیلوں کے فروغ کیلئے گورنر کے اقدامات کو سراہا اور خیبر پختونخوا میں کھیلوں کے فروغ اور نوجوانوں کی ترقی کیلئے مشترکہ جدوجہد کے عزم کا بھی اعادہ کیا۔