Live Updates

بارش کے دوران حکومت پر تنقید کے بعد مبینہ طور پر گرفتار شہری لاپتہ، بازیابی کی درخواست دائر

پولیس نے والد سے معافی کی ویڈیوز بنوا کر سوشل میڈیا پر شئیر کیں، کوئی مقدمہ ہے نہ کسی عدالت میں پیش کر رہے ہیں، ایس ایچ او جوہر ٹاؤن نے 2 دن سے حبس بے جا میں رکھا ہوا ہے؛ درخواست گزار کا مؤقف

ساجد علی پیر 14 جولائی 2025 15:44

بارش کے دوران حکومت پر تنقید کے بعد مبینہ طور پر گرفتار شہری لاپتہ، ..

لاہور ( اُردو پوائنٹ اخبارتازہ ترین۔ 14 جولائی 2025ء ) لاہور میں بارش کے دوران حکومت پر تنقید کرتے ہوئے وزیر اعلیٰ پنجاب مریم نواز اور آرمی چیف کے خلاف نازیبا زبان استعمال کرنے کے باعث مبینہ طور پر گرفتار کیے جانے والے ساجد نواز نامی شہری کی بازیابی کے لیے درخواست دائر کردی گئی۔ میڈیا رپورٹس کے مطابق اس حوالے سے لاپتہ شخص کے بیٹے عمر نے لاہور کی سیشن کورٹ میں درخواست دائر کی ہے، ساجد نواز کے بیٹے نے درخواست میں کہا کہ ’والد کو پولیس نے 2 دن سے گرفتار کر رکھا ہے، کوئی مقدمہ ہے نہ کسی عدالت میں پیش کر رہے ہیں، سٹیشن ہاؤس افسر (ایس ایچ او) جوہر ٹاؤن نے میرے والد کو 2 دن سے حبس بے جا میں رکھا ہوا ہے، پولیس نے میرے والد سے معافی کی ویڈیوز بنوا کر سوشل میڈیا پر شئیر کیں، میرے والد کو بازیاب کروانے کا حکم دیا جائے۔

(جاری ہے)

بتایا گیا ہے کہ درخواست گزار کی جانب سے ایڈووکیٹ سمیر خان خٹک، ایڈووکیٹ نعمان سرور ڈوگر پیش ہوئے، جس پر ایڈیشنل اینڈ سیشن جج غلام فرید نے نوٹس جاری کرتے ہوئے 15 جولائی کو پولیس سے جواب طلب کرلیا، عدالت نے حکم دیا کہ ’اگر مغوی پولیس کی تحویل میں ہے تو کل بحفاظت عدالت میں پیش کیا جائے‘، بعد ازاں عدالت کی جانب سے سماعت کل تک ملتوی کردی گئی۔

یاد رہے کہ صوبہ پنجاب کے دارالحکومت لاہور میں بارش کے دوران راستوں کی بندش کے دوران برسات کے پانی سے بھرے روڈ پر سے اپنی موٹر سائیکل پر جاتے ہوئے ایک شہری کی ویڈیو سوشل میڈیا پر خاصی وائرل ہوئی جس میں شہری کو حکومت پر شدید تنقید کرتے ہوئے دیکھا اور سنا گیا، بعد ازاں وہی شہری ایک اور تصویر میں پولیس موبائل میں بیٹھا دکھائی دیا جس سے بظاہر یہی معلوم ہوا کہ مبینہ طور پر پولیس نے اس شخص کو گرفتار کرلیا۔

اس کے علاوہ شہری کی ایک اور ویڈیو بھی سامنے آئی جس میں وہ حکومت پر اپنی تنقید پر معذرت کرتے ہوئے دکھائی دیا، مسلم لیگ ن کی رہنماء حنا پرویز بٹ کی جانب سے شیری کی معذرت کی ویڈیو شیئر کی گئی جس کے ساتھ انہوں نے لکھا کہ ’یہ وہی ہے نہ جو گزشتہ روز بکواس کر رہا تھا؟؟ کہاں گیا وہ جوش؟‘۔