تامل ناڈو کے وزیرا علیٰ کا جموں و کشمیر میں جمہوری حقوق کی خلا ف ورزیوں پرتشویش کا اظہار

منگل 15 جولائی 2025 15:57

سرینگر (اُردو پوائنٹ اخبارتازہ ترین - اے پی پی۔ 15 جولائی2025ء) دراوڑ منیترا کزگم کے صدر اورتامل ناڈو کے وزیر اعلیٰ ایم کے سٹالن نے بھارت کے غیر قانونی زیر تسلط جموں و کشمیر میں جمہوری حقوق کی سنگین خلاف ورزیوں پر تشویش کا اظہار کیا ہے ۔کشمیر میڈیا سروس کے مطابق ان خیالات کا اظہار انہوں نے جموں و کشمیر کے وزیر اعلی عمر عبداللہ کو13جولائی 1931کے شہدا کو خراج عقیدت پیش کرنے کے لئے مزار شہدا نقشبندصاحب سرینگر جانے سے روکنے کے لئے لگائی گئی پابندیوں پر ردعمل ظاہر کرتے ہوئے کیا۔

انہوں نے ایکس پر پوسٹ میں کہاکہ جموں و کشمیر کی ریاستی حیثیت کی بحالی کا مطالبہ زورپکڑ رہا ہے جبکہ مقبوضہ علاقے میں شہری اور جمہوری حقوق پر عائد پابندیوں سے جموں وکشمیر کی سنگین صورتحال کی عکاسی ہوتی ہے ۔

(جاری ہے)

انہوں نے عمر عبداللہ کے ساتھ مبینہ بدسلوکی کی مذمت کرتے ہوئے کہاکہ ایک منتخب وزیراعلیٰ کو محض جولائی1931کے شہدا کو خراج عقیدت پیش کرنے سے روکنے کے لئے گھر میں نظر بند کر دیا گیا جو انتہائی افسوسناک ہے ۔

ایم کے سٹالن نے کہاکہ یہ صرف ایک ریاست یا ایک لیڈر کے بات نہیں ہے تامل ناڈو سے لے کر کشمیر تک بی جے پی حکومت منظم طریقے سے تمام ریاستی حکومتوں کے حقوق چھین رہی ہے۔انہوں نے کہاکہ اگر یہ واقعہ کشمیر میں ہو سکتا ہے، تو یہ کہیں بھی عوام کے کسی بھی منتخب نمائندے کے ساتھ ہو سکتا ہے۔