جہلم ویلی میں پبلک ٹرانسپورٹ کی پہیہ جام ہڑتال،عوام،سرکاری ملازمین کو سفر میں شدید مشکلات کاسامنا

منگل 15 جولائی 2025 23:04

چناری (اُردو پوائنٹ اخبارتازہ ترین - آن لائن۔ 15 جولائی2025ء)مظفرآباد اور جہلم ویلی کے ٹرانسپورٹر کے درمیان ٹائم کے تنازعہ پر جہلم ویلی بھر میں پبلک ٹرانسپورٹ کی پہیہ جام ہڑتال،عوام،سرکاری ملازمین کو سفر میں شدید مشکلات کاسامنا،اندرون ضلع پرائیویٹ گاڑیاں،رکشہ،موٹر سائیکل چلتے رہے۔

(جاری ہے)

تفصیلات کے مطابق مظفرآباد اور جہلم ویلی کے ٹرانسپورٹر کے درمیان ٹائم کے تنازعہ پر منگل کے روز جہلم ویلی بھر میں پبلک ٹرانسپورٹ نے مکمل پہیہ جام ہڑتال کی ،البتہ اندرون ضلع پرائیویٹ گاڑیاں ،رکشہ ،موٹر سائیکل چلتے رہے ،چیئرمین ٹرانسپورٹ یونین جہلم ویلی راجہ محمد فرید خان کا موقف ہے کہ مظفرآباد ،جہلم ویلی انتظامیہ اور قانون نافذ کرنے والے ادارے عدالتی سٹے آرڈرز کے باوجود جہلم ویلی کے مقامی ٹرانسپورٹرز کے خلاف کارروائیاں کر رہے ہیں، بااثر، غنڈہ عناصر کو فائدہ پہنچا کر لوکل ٹرانسپورٹ سروس کو نقصان پہنچایا جا رہا ہے، جو کہ ناقابل قبول ہے،ہماری گاڑیاں چالیس ،چالیس سال سے مکمل قانونی لوازمات پورے کر کے چل رہی ہیں ،نئی گاڑیوں کو جہلم ویلی کے روٹس پر ڈال کر پرانے ٹرانسپورٹروں کی روزی پر حملہ کیا جا رہا ہے، جب تک عدالتی احکامات پر مکمل عملدرآمد اور ٹرانسپورٹرز کے تحفظات کا ازالہ نہیں ہوتا ہمارا پرامن احتجاج جاری رہے گا، مظفرآباد اور جہلم ویلی انتظامیہ مظفرآباد اور جہلم ویلی کے ٹرانسپورٹر کے درمیان پائے جانے والے تنازعہ کو بات چیت کے زریعے حل کرنے اور ہڑتال ختم کروانے کے لیے متحرک ہے،دوسری طرف پاکستان پیپلز پارٹی آزاد کشمیر کے مرکزی سینئر نائب صدر صاحبزادہ محمد اشفاق ظفر ایڈووکیٹ نے کہا ہے کہ عوام کو مزید پریشانی سے بچانے کے لیے انتظامیہ فوری طور پر ٹرانسپورٹر کے تمام جائز مطالبات حل کرے،ٹرانسپورٹر اپنا سرمایہ لگا کر عوام کی خدمت کرتے ہیںانھیں مزید مسائل سے دوچار نہ کیا جائے ۔

۔۔۔۔