چین علاقائی سلامتی کے منظرنامے میں استحکام کا عنصر ہے: جنرل ساحر شمشاد مرزا

بدھ 16 جولائی 2025 00:00

راولپنڈی (اُردو پوائنٹ اخبارتازہ ترین - اے پی پی۔ 16 جولائی2025ء) چیئرمین جوائنٹ چیفس آف اسٹاف کمیٹی (CJCSC) جنرل ساحر شمشاد مرزا (نشانِ امتیاز ملٹری) نے منگل کو عوامی جمہوریہ چین کی پیپلز لبریشن آرمی ( پی ایل اے ) کے 98ویں یومِ تاسیس کی تقریب سے بطور مہمانِ خصوصی خطاب کرتے ہوئے چینی عوام، فوجی قیادت اور پیپلز لبریشن آرمی کے تمام اہلکاروں کو دلی مبارکباد دی اور چین کو علاقائی سلامتی کے منظرنامے میں ایک مستحکم عنصر قرار دیا۔

پاک فوج کے شعبہ تعلقات عامہ آئی ایس پی آر کے جاری کردہ بیان کے مطابق انہوں نے اپنے خطاب میں صدر شی جن پنگ کی بصیرت افروز قیادت میں چین کی شاندار ترقی اور تیز رفتار جدیدیت میں پیپلز لبریشن آرمی کے کلیدی کردار کو سراہا، جس نے عوامی جمہوریہ چین کو امن، استحکام اور خوشحالی کا ایک اہم ستون بنا دیا ہے۔

(جاری ہے)

جنرل ساحر شمشاد مرزا نے پاکستان اور چین کے درمیان پائیدار اور آزمودہ "آہنی بھائی چارے" پر روشنی ڈالتے ہوئے کہا کہ دونوں ممالک کا عزم اس منفرد تعلق کو ہر شعبے میں مزید وسعت اور گہرائی دینا ہے۔

انہوں نے پاکستان میں کام کرنے والے چینی شہریوں کی سکیورٹی سے متعلق پاکستان کے غیر متزلزل عزم، سی پیک میں تعاون کو آگے بڑھانے، دفاعی روابط مضبوط بنانے اور علاقائی ہم آہنگی و ترقی کو فروغ دینے کے عزم کو دہرایا۔تقریب میں ممتاز سول و عسکری حکام، میڈیا نمائندگان، کاروباری شخصیات اور سول سوسائٹی کے ارکان نے شرکت کی، جو اس شراکت داری کے لیے وسیع حمایت کی عکاسی کرتا ہے۔