پاکستان سنگل ونڈو نے نسٹ کے پروفیشنل ڈویلپمنٹ سینٹر کے تعاون سے نیکسٹ ٹیک انٹرن شپ پروگرام کا آغاز کر دیا

بدھ 16 جولائی 2025 16:34

اسلام آباد (اُردو پوائنٹ اخبارتازہ ترین - اے پی پی۔ 16 جولائی2025ء) پاکستان سنگل ونڈو نے اپنے کارپوریٹ سماجی ذمہ داری (سی ایس آر) پروگرام کے تحت نیشنل یونیورسٹی آف سائنسز اینڈ ٹیکنالوجی (نسٹ) کے پروفیشنل ڈویلپمنٹ سینٹر کے تعاون سے نیکسٹ ٹیک انٹرن شپ پروگرام کا آغاز کر دیا ہے۔یہ چھ ہفتے کا پروگرام نوجوانوں کو بلاک چین، مصنوعی ذہانت، سائبر سکیورٹی اور ڈیٹا سائنس جیسے جدید شعبوں میں عملی تربیت دے گا۔

منتخب طلبہ پی ایس ڈبلیو کے ماہرین کی رہنمائی میں نہ صرف سیکھیں گے بلکہ جدید پروجیکٹس پر کام بھی کریں گے۔

(جاری ہے)

پی ایس ڈبلیو کے سی ای او آفتاب حیدر نے کہاکہ ہم نوجوانوں کو صرف تربیت نہیں دے رہے، ہم انہیں پاکستان کے ڈیجیٹل مستقبل کا معمار بنا رہے ہیں۔پہلے مرحلے میں 10 باصلاحیت طلبہ کو منتخب کیا گیا ہے جو اس انٹرن شپ کے ذریعے اپنی صلاحیتوں کو نکھاریں گے، خوداعتمادی حاصل کریں گے اور پاکستان کی ڈیجیٹل ترقی کا حصہ بنیں گے۔یہ پروگرام نوجوانوں کو صرف ٹیکنالوجی سکھانے تک محدود نہیں، بلکہ انہیں یہ سمجھنے کا موقع بھی دیتا ہے کہ جدید ٹیکنالوجی اور ڈیجیٹل تجارت کس طرح پاکستان کی معیشت کو آگے بڑھانے اور ملک کو ترقی کی نئی راہوں پر گامزن کرنے میں کلیدی کردار ادا کر رہی ہیں۔