وزیر اعلیٰ خیبر پختونخوا علی امین گنڈاپور کا دورہ پولیس لائنز پشاور

پشاور (اُردو پوائنٹ اخبارتازہ ترین - اے پی پی۔ 16 جولائی2025ء) وزیر اعلیٰ خیبر پختونخوا علی امین گنڈاپور نے پولیس لائنز پشاور کے دورہ کے موقع پر کہا کہ جو قومیں اپنے شہداء کو عزت دیتی ہیں وہ ناقابل شکست ہوتی ہیں۔وزیر اعلی ہاؤس پشاور حکام کی جانب سے جاری شدہ تفصیلات کے مطابق پولیس لائنز پشاور دورہ کے موقع پر انسپکٹر جنرل آف پولیس اور پولیس کے دیگر اعلیٰ حکام نے وزیر اعلیٰ کا استقبال کیا، اور پولیس کے چاق وچوبند دستے نے سلامی دی، وزیر اعلیٰ نے یاد گار شہداء پر حاضری دی اور پھول رکھے۔

اس موقع پر وزیر اعلیٰ نے پولیس کو فراہم کی گئی نئی اے پی سیز، بلٹ پروف گاڑیوں، اسلحہ، اور دیگر جدید آلات کا معائنہ بھی کیا۔وزیر اعلیٰ نے پولیس لائنز میں منعقد پولیس دربار میں خطاب کرتے ہوئے کہا کہ جو قومیں اپنے شہداء کو عزت دیتی ہیں وہ ناقابل شکست ہوتی ہیں، جب تک شہداء اور ان کے خاندانوں کو عزت نہیں بخشیں گے، پولیس کے جوانوں میں قربانی کا جذبہ نہیں پیدا ہوگا، شہداء کے اہل خانہ کسی بھی سرکاری دفتر میں جائیں گے، تو کھڑے ہو کر ان کا استقبال کیا جائے گا۔

(جاری ہے)

علی امین گنڈاپور نے کہا کہ وزیر اعلیٰ کے دفتر میں بھی شہداء کے اہل خانہ کا کھڑے ہوکر استقبال کیا جائے گا، پولیس شہداء نے ہمارے تحفظ کے لیے اپنی جانوں کا نذرانہ پیش کیا ہے، پولیس کے پاس وسائل کی کمی کو پہلی ترجیح میں پورا کر رہے ہیں، جب پہلے مجھے پولیس دربار میں شرکت کی دعوت دی گئی تو میں نے کہا کہ جب پولیس کے لیے کچھ کرلوں گا تب شرکت کروں گا۔

وزیراعلیٰ خیبرپختونخوا نے کہا کہ گذشتہ ایک سال کے دوران پولیس کی ضروریات پوری کرنے پر کافی کام کیا مزید بھی کریں گے، پولیس کی ضروریات پوری کرنے کے لئے وسائل کی کمی کو کھبی رکاوٹ نہیں بننے دیا جائے گا، ہم نے پولیس فورس کا بجٹ رواں سال 124 ارب روپے سے بڑھا کر 158 ارب کر دیا ہے۔انہوں نے کہا کہ پولیس کی تنخواہ میں اضافہ انکا اپنا حق تھا، ہم نے کے پی پولیس کی تنخواہوں کو بڑھا کر دیگر صوبوں کے برابر کر دیا، شہداء کے بچوں کے لیے بطور اے ایس آئی بھرتی کا کوٹہ 5 فیصد سے بڑھا کر 12.5 فیصد کر دیا جبکہ اس نئے کوٹہ کے تحت 280 شہداء کے ورثاء کو بھرتی بھی کر لیا گیا ہے۔

وزیر اعلیٰ نے کہا کہ پولیس میں ترقیوں کے عمل کو تیز کردیا گیا ہے، شہداء کے ورثاء کے لیے مفت پلاٹوں کا جو اعلان کیا تھا، رواں سال سرکاری ہاؤسنگ سوسائٹیز میں انہیں پلاٹ دیئے جائیں گے، ہم بار بار کہہ چکے ہیں عوام و پولیس کے جان و مال کے تحفظ کے لیے خزانہ حاضر ہے ، پولیس فورس کا تحفظ ہماری پہلی ترجیح ہے، پہلی فرصت میں ہم نے جدید آلات و اسلحہ فراہم کر دیئے ہیں ، پولیس افسران و اہلکار کسی کی بھی سفارش نہ مانیں، میرٹ کی بنیاد پر لوگوں کو انصاف فراہم کریں۔

علی امین گنڈاپور نے کہا کہ میں نے بحیثیت وزیر اعلیٰ پولیس میں ایک بھی سفارش نہیں کی، جب وزیر اعلیٰ سفارش نہیں کرتا تو کسی کی بھی سفارش کو نہ مانا جائے اور میرٹ پر کام کیا جائے، بس اس بات کو یقینی بنایا جائے کہ کوئی بھی کمزور انصاف سے محروم اور ظالم سزا سے بچ نہ سکے، میں بحیثیت وزیر اعلیٰ پولیس فورس کو اس سلسلے میں بھرپور سپورٹ فراہم کروں گا۔

انہوں نے ٹریفک پولیس اہلکاروں کو کہا کہ چھوٹی موٹی خلاف ورزیوں پر غریب محنت کشوں کو چالان کم اور وارننگ زیادہ دیں، یہ لوگ بڑی مشکل سے اپنے بچوں کے لئے رزق کماتے ہیں، زیادہ چالان بھرنے کی استطاعت نہیں رکھتے، ٹریفک قوانین کی خلاف ورزی پر بڑی گاڑیوں والے طاقتور لوگوں کو زیادہ چالان دیں۔ان کا کہنا تھا کہ امن و امان کی بہتری ہماری اولین ترجیح ہے، امن ہوگا تو ترقی ہوگی، امن و امان کی بہتری کے لیے جتنے وسائل درکار ہونگے، پولیس کو پہلی فرصت میں ملیں گے، آخر میں دربار میں پولیس شہداء کے درجات کی بلندی کے لئے اجتماعی دعا بھی کی گئی۔