Live Updates

لاہور میں بارش کے دوران شہری موٹرسائیکل سمیت مین ہول میں جا گرا

موقع پر موجود افراد نے اپنی مدد آپ کے تحت شہری کو پانی سے نکالا، موٹر سائیکل مین ہول میں ہی کھو گئی

ساجد علی بدھ 16 جولائی 2025 17:40

لاہور ( اُردو پوائنٹ اخبارتازہ ترین۔ 16 جولائی 2025ء ) صوبہ پنجاب کے دارالحکومت لاہور میں بارش کے دوران شہری موٹرسائیکل سمیت مین ہول میں جا گرا۔ تفصیلات کے مطابق یہ افسوسناک واقعہ لاہور کے علاقہ شاہدرہ کے رسول پارک میں پیش آیا جہاں سیوریج کی کھدائی کے بعد طوفانی بارش کی وجہ سے وہاں پانی کھڑا ہوگیا اور بارش کے دوران شہری موٹر سائیکل سمیت کھلے مین ہول کے اندر گر گیا، جس کے بعد موقع پر موجود افراد نے اپنی مدد آپ کے تحت شہری کو بحفاظت پانی سے نکال لیا، تاہم شہری کی موٹر سائیکل مین ہول میں ہی کھوگئی، لاہور کے شاہدرہ ٹاؤن میں موٹرسائیکل سوار کے گڑھے میں گرنے کی سی سی ٹی وی فوٹیج بھی سامنے آئی، جس میں دیکھا جاسکتا ہے کہ شہری موٹرسائیکل پر اپنے گھر سے نکلتا ہے اور تھوڑا آگے جاتے ہی کھلے مین ہول میں گرجاتا ہے۔

(جاری ہے)

لاہور، شاہدرہ رسول پارک میں بارش کے دوران شہری موٹر سائیکل سمیت کھلے مین ہول کے اندر گر گیا،موقع پر موجود افراد نے اپنی مددگار کے تحت شہری کو حفاظت نکال لیا۔ pic.twitter.com/jscsNg110k
— Muhammad Umair (@MohUmair87) July 16, 2025

بتایا جارہا ہے کہ لاہور سمیت گردونواح میں رات بھر ہونے والی موسلا دھار بارش سے متعددعلاقے زیر آب آگئے، حادثات میں ایک ہی خاندان کے 5 افراد سمیت 10 شہری جاں بحق ہوگئے، لاہور کے علاقے پانی والا تالاب میں سب سے زیادہ 171 ملی میٹر، اقبال ٹاؤن میں 169 ملی میٹر، تاجپورہ میں 167 ملی میٹر، بارش ریکارڈ کی گئی جو رواں مون سون سیزن کی بلند ترین مقدار ہے، اس کے علاوہ مغلپورہ میں 135، لکشمی چوک میں 133 ملی میٹر بارش ریکارڈ ہوئی۔

معلوم ہوا ہے کہ شدید بارش کے باعث ٹھوکر نیاز بیگ کے علاقے میں افسوسناک حادثہ پیش آیا جہاں ایک گھر کی چھت گرنے سے ایک ہی خاندان کے 5 افراد جاں بحق اور 2 زخمی ہو گئے، جاں بحق افراد میں 60 سالہ مانگا، 55 سالہ عشرت، 35 سالہ رانی، 4 سالہ لطیفہ اور 3 سالہ خدیجہ شامل ہیں، زخمیوں میں 30 سالہ فیصل اور 5 سالہ ببلی شامل ہیں، زخمیوں کو فوری طبی امداد کے لیے ہسپتال منتقل کر دیا گیا، اس کے علاوہ رائیونڈ کے علاقے مشن کالونی میں مکان کی چھت گرنے سے 3 افراد جان کی بازی ہار گئے، ایک شخص کو زندہ نکال لیا گیا اور ہربنس پورہ میں کرنٹ لگنے سے 2 بچے دم توڑ گئے۔