کراچی‘ ایک اور کروڑ پتی، ایوارڈ یافتہ ماسی چوری کے مقدمے میں گرفتار

بدھ 16 جولائی 2025 21:13

کراچی (اُردو پوائنٹ اخبارتازہ ترین - آن لائن۔ 16 جولائی2025ء)کراچی کے پوش علاقے ڈیفنس سے ایک اور کروڑ پتی ماسی کو گرفتار کیا گیا ہے جس سے دورانِ تحقیقات اہم انکشافات سامنے آئے ہیں۔تفتیشی حکام کا کہنا ہے کہ چوری کے مقدمے میں گرفتار ملزمہ مہرین اسلام آباد کی ایک جیل میں 3 سال گزار چکی ہے۔ملزمہ نے تفتیشی حکام کو بیان دیا کہ قید کے دوران جیل میں سلائی کا کام کرنے پر سابق وزیرِ اعظم نے اسے ایوارڈ بھی دیا تھا۔

پولیس کے مطابق ملزمہ مہرین کا تعلق فیصل آباد سے ہے، اس کے خلاف لاہور میں بھی متعدد مقدمات درج ہیں، ملزمہ کے خلاف دسمبر 2024ء میں شوکت محمود نے ڈیفنس تھانے میں مقدمہ درج کروایا تھا۔مقدمے کے متن کے مطابق ملزمہ نے چائے میں نشہ آور دوا پلا کر اہلخانہ کو بیہوش کیا، اس کے بعد گھر سے زیورات نقدی اور دیگر سامان لوٹ کر فرار ہوگئی تھی۔

(جاری ہے)

تفتیشی حکام کا کہنا تھا کہ مذکورہ واردات مجموعی طور پر 65 لاکھ روپے سے زائد کی تھی، ملزمہ مہرین چوری کی واردات میں فیروز آباد تھانے میں گرفتار ہوئی تھی، گرفتاری کی اطلاع ملنے پر مدعی مقدمہ فیروز آباد تھانے پہنچے اور ملزمہ کو شناخت کیا۔

تفتیشی افسر کے مطابق ڈیفنس پولیس نے بھی مقدمے میں ملزمہ کی گرفتاری ڈال دی ہے۔اس کے علاوہ تفتیشی حکام کے مطابق ملزمہ فیروز آباد تھانے میں چوری کے 3 مقدمات میں بھی گرفتار ہے، ملزمہ کلفٹن اور گذری کے کئی گھروں میں بھی کروڑوں روپے کی چوری کرچکی ہے، ملزمہ سے مزید تحقیقات کی جا رہی ہیں۔