کراچی گارمنٹس فیکٹری آتشزدگی؛ آگ نے مزید 2 فیکٹریوں کو لپیٹ میں لے لیا، دیگر میں کام بند

ایس ایس یو کمانڈوز بھی موقع پر پہنچ گئے، پولیس نے علاقے کو گھیرے میں لے لیا اور قریبی سڑکوں پر ٹریفک بند کردی گئی ہے تاکہ ریسکیو آپریشن میں کوئی رکاوٹ نہ آنے دی جائے

ساجد علی منگل 9 ستمبر 2025 12:07

کراچی گارمنٹس فیکٹری آتشزدگی؛ آگ نے مزید 2 فیکٹریوں کو لپیٹ میں لے لیا، ..

کراچی ( اُردو پوائنٹ اخبارتازہ ترین۔ 09 ستمبر 2025ء ) صوبہ سندھ کے دارالحکومت کراچی کی ایک گارمنٹس فیکٹری میں آتشزدگی کے بعد آگ نے مزید 2 فیکٹریوں کو لپیٹ میں لے لیا، جس کی وجہ سے پولیس نے دیگر فیکٹریوں میں کام بند کروادیا۔ میڈیا رپورٹس کے مطابق شہر قائد کے علاقہ نیو کراچی میں صبا سینما کے قریب واقع گارمنٹس فیکٹری میں آگ لگ گئی، فائربریگیڈ حکام نے بتایا کہ جیسے ہی فیکٹری میں آگ لگنے کی اطلاع ملی تو اس کے بعد فوری طور پر 2 گاڑیاں آگ بجھانے کیلئے روانہ کی گئیں لیکن آگ کی شدت میں اضافے کے بعد مزید گاڑیاں طلب کی گئیں اور اس وقت 11 فائر ٹینڈرز آگ بجھانے میں مصروف ہیں لیکن آگ پر تاحال قابو نہیں پایا جاسکا۔

بتایا گیا ہے کہ نیو کراچی انڈسٹریل ایریا میں گارمنٹس فیکٹری میں لگنے والی آگ شدت اختیار کرچکی ہے، جس نے پہلے فیکٹری کی پہلی منزل کو اپنی لپیٹ لیا لیکن دیکھتے ہی دیکھتے آگ پوری فیکٹری میں پھیل گئی اور نیو کراچی میں گارمنٹس فیکٹری میں آتشزدگی کے بعد تین منزلہ عمارت منہدم ہوگئی، فیکٹری کے گرتے ہی زوردار دھماکہ ہوا، اس دوران متعددافراد زخمی ہوگئے۔

(جاری ہے)

معلوم ہوا ہے کہ آگ نے مزید 2 فیکٹریوں کو لپیٹ میں لے لیا جس کی وجہ سے پولیس نے دیگر فیکٹریوں میں کام بند کروادیا، آتشزدگی کے باعث قریبی علاقے میں خوف و ہراس پھیل گیا، دھوئیں کے بادل دور دور تک دکھائی دیئے، فائرفائٹرز کی جانب سے آگ پر قابو پانے اور ملبے تلے دبے افراد کو نکالنے کی کوششیں جاری ہیں، ریسکیو حکام نے ملبے تلے متعدد افراد کے پھنسے ہونے کا خدشہ ظاہر کیا ہے۔

بتایا جارہا ہے کہ تاحال جانی و مالی نقصان کے حوالے سے سرکاری طور پر کوئی تصدیق نہیں کی گئی، سرچ اینڈ ریسکیو آپریشن مکمل ہونے کے بعد صورتحال واضح ہوگی جس کے لیے ایس ایس یو کمانڈوز بھی موقع پر پہنچ گئے ہیں اور دیگر ریسکیو اداروں کے ساتھ مل کر امدادی کارروائیوں میں حصہ لے رہے ہیں، پولیس نے علاقے کو گھیرے میں لے لیا اور قریبی سڑکوں پر ٹریفک بند کردی گئی ہے تاکہ ریسکیو آپریشن میں کوئی رکاوٹ نہ آئے۔