Live Updates

بھارتی ریاست ہماچل پردیش میں بارشوں سے تباہی، ہلاکتیں 106 تک جا پہنچیں

بدھ 16 جولائی 2025 21:13

ہماچل پردیش(اُردو پوائنٹ اخبارتازہ ترین - آن لائن۔ 16 جولائی2025ء) بھارتی ریاست ہماچل پردیش میں مون سون بارشوں نے تباہی مچادی جس کے نتیجے میں اب تک 106 افراد ہلاک ہوچکے ہیں۔ریاست اپنے جائز پانی کو بھی نہ سنبھال سکی اور نہ تباہی کو روک سکی، اپوزیشن کی طرف سے شدید تنقید جاری ہے۔بھارتی میڈیا رپورٹس کے مطابق سٹیٹ ڈیزاسٹر مینجمنٹ اتھارٹی نے بتایا ہے کہ ریاست ہماچل پردیش میں مون سون کی بارشوں کا سلسلہ 20 جون سے جاری ہے جس کے باعث سیلابی صورتحال کا سامنا ہے۔

ایس ڈی ایم اے کے مطابق 20 جون سے 15 جولائی کے دوران ہونے والی بارشوں سے 106 افراد ہلاک ہوچکے ہیں جس میں سے 62 افراد کی اموات لینڈسلائیڈنگ، سیلاب، کلاؤڈ برسٹ، ڈوبنے اور کرنٹ لگنے سے ہوئی جبکہ اسی دوران مزید 44 افراد سڑک حادثات میں اپنی جانوں سے ہاتھ دھو بیٹھے ہیں۔

(جاری ہے)

انتظامیہ نے انسانی جانوں کے ضیاع کے علاوہ املاک اور بنیادی ڈھانچے کو ہونے والے وسیع نقصان پر بھی رپورٹ جاری کی ہے جس کے مطابق 293 سے زیادہ پکے اور 91 کچے مکانات مکمل طور پر تباہ ہو گئے ہیں۔

اس کے علاوہ تقریباً 850 ایکڑ زرعی اراضی متاثر ہوئی اور 81 کروڑ روپے سے زائد مالیت کی سرکاری املاک کو نقصان پہنچا ہے جس میں سڑکیں، پانی کی فراہمی کا سٹرکچر، بجلی کا بنیادی ڈھانچہ، صحت اور تعلیم کی عمارتیں شامل ہیں۔ڈیزاسٹر مینجمنٹ حکام نے مختلف علاقوں میں مزید بارشوں کے پیش نظر عوام سے الرٹ رہنے اور حفاظتی ہدایات پر عمل کرنے کی اپیل کی ہے۔