پنجاب اسمبلی میں اپوزیشن معطلی پر مذاکراتی کمیٹی کا تیسرا دور 17 جولائی کو ہوگا

بدھ 16 جولائی 2025 22:22

لاہور (اُردو پوائنٹ اخبارتازہ ترین - آن لائن۔ 16 جولائی2025ء) پنجاب اسمبلی میں اپوزیشن کے 26 ارکان کی معطلی کے معاملے پر قائم مذاکراتی کمیٹی کا تیسرا دور کل بروز بدھ (17 جولائی) کو منعقد ہوگا۔ پنجاب اسمبلی سیکرٹریٹ نے اس حوالے سے باقاعدہ نوٹیفکیشن جاری کر دیا ہے۔نوٹیفکیشن کے مطابق 19 رکنی مذاکراتی کمیٹی شام 4 بجے اجلاس منعقد کرے گی، جس میں حکومتی و اپوزیشن اراکین شرکت کریں گے تاکہ معطل شدہ اپوزیشن ارکان کی اسمبلی میں واپسی کے لیے لائحہ عمل طے کیا جا سکے۔

(جاری ہے)

کمیٹی کے حکومتی اراکین میں وزیر خزانہ مجتبیٰ شجاع الرحمٰن، وزیر صحت خواجہ سلمان رفیق، سمیع اللہ خان، رانا محمد ارشد، وزیر صنعت چودھری شافع حسین، سید علی حیدر گیلانی، چودھری افتخار چھچھر، راحیلہ خادم حسین، امجد علی جاوید، احمد اقبال اور شعیب صدیقی شامل ہیں۔جبکہ اپوزیشن کی نمائندگی ملک احمد خان بھچر، اعجاز شفیع، معین ریاض، رانا شہباز اور علی امتیاز وڑائچ کریں گے۔یاد رہے کہ گزشتہ دو ادوار میں معطلی کے معاملے پر فریقین میں کسی متفقہ حل پر پہنچنے میں پیش رفت نہ ہو سکی تھی۔ کل کا اجلاس اس بات کا تعین کرے گا کہ کیا فریقین اسمبلی کی کارروائی کو خوش اسلوبی سے بحال کرنے پر کسی سمجھوتے تک پہنچ سکتے ہیں یا نہیں۔