چیف سیکرٹری کی زیر صدارت بوستان اسپیشل اکنامک زون کے حوالہ سے اجلاس ،سہولیات کی فراہمی کا جائزہ

بدھ 16 جولائی 2025 21:40

کوئٹہ (اُردو پوائنٹ اخبارتازہ ترین - اے پی پی۔ 16 جولائی2025ء) چیف سیکرٹری بلوچستان شکیل قادر خان کی زیر صدارت بوستان سپیشل اکنامک زون کے حوالہ سے اجلاس منعقد ہوا جس میں سرمایہ کاروں کو سہولیات کی فراہمی کا جائزہ لیا گیا ۔اجلاس سے اظہار خیال کرتے ہوئے چیف سیکرٹری نے کہا کہ سرمایہ کاروں کو سہولیات کی فراہمی کے حوالے سے صوبائی حکومت فعال اقدامات اٹھا رہی ہیں ہیں تاکہ ملکی اور غیر ملکی سرمایہ کاری کو فروغ دیا جا سکے۔

(جاری ہے)

انہوں نے کہا کہ صوبائی حکومت نے سرمایہ کاروں کو ہر ممکن سہولیات فراہم کرنے کا اعادہ کیا ہے۔ صوبے میں کاروباری ماحول کو بہتر بنانے اور سرمایہ کاری میں آسانی پیدا کرنے کے لیے اقدامات کیے جا رہے ہیں۔ انہوں نے کہا کہ بجلی، پانی، اور دیگر بنیادی سہولیات کو بہتر بنا کر اکنامک زونز کو فعال کیا جا رہا ہے تاکہ سرمایہ کاری کا ماحول سازگار ہو۔ انہوں نے کہا کہ ان اقدامات کا مقصد پاکستان میں بیرونی اور ملکی سرمایہ کاری کو فروغ دینا، معیشت کی ترقی کو مضبوط کرنا اور کاروباری ماحول کو سرمایہ کاروں کے لیے دوستانہ بنانا ہے۔ اجلاس میں سیکرٹری انڈسٹریز خالد سرپرہ اور وائس چیئرمین بی بی او آئی ٹی بلال کاکڑ نے شرکت کی۔