ق*حکومت سندھ کی جانب سے کراچی کی شاہراہوں کو شمسی توانائی سے روشن کرنے کا فیصلہ

منصوبہ کے ایم سی کے وسیع تر گرین انرجی اقدام کا حصہ ہے،شہر کے ہر ضلع اور مصروف علاقوں میں عوامی بیت الخلا قائم کیے جائیں، میئر کراچی کی ہدایت

بدھ 16 جولائی 2025 21:40

I کراچی(اُردو پوائنٹ اخبارتازہ ترین - آن لائن۔ 16 جولائی2025ء)حکومت سندھ کی جانب سے کراچی کی شاہراہوں کو شمسی توانائی سے روشن کرنے کا فیصلہ کرلیا گیا ہے۔میئر کراچی بیرسٹر مرتضیٰ وہاب نے کہا ہے کہ کراچی کی اہم سڑکوں کو شمسی توانائی سے روشن کرنے کے منصوبے پر کام کا آغاز کردیا ہے، 30 ستمبر تک منصوبہ مکمل ہوجائیگا، بڑے شہری راستوں پر سولر اسٹریٹ لائٹس نصب کی جائیں گی۔

(جاری ہے)

انہوں نے کہا کہ یہ منصوبہ کے ایم سی کے وسیع تر گرین انرجی اقدام کا حصہ ہے جس میں شارع فیصل، میرین ڈرائیو (کلفٹن)، شارع ایران اور شارع فردوس شامل ہیں، اس منصوبے کے لیے خریداری کا عمل مکمل ہو چکا ہے اور اگست کے دوسرے ہفتے تک ایک ہزار سے زائد سولر پولز اور لائٹس پر مشتمل کھیپ کراچی پہنچنے کی توقع ہے۔میئر کراچی بیرسٹر مرتضیٰ وہاب نے اجلاس کے دوران کہا کہ یہ صرف اسٹریٹ لائٹس نہیں بلکہ پائیداری میں ایک طویل المدتی سرمایہ کاری ہے، یہ اقدام نہ صرف روشنی کے نظام کو بہتر بنائے گا بلکہ بجلی کے اخراجات میں نمایاں کمی اور ماحولیاتی بہتری کا باعث بھی بنے گا، اس منصوبے میں پانچ سالہ آپریشن اور مینٹیننس پلان بھی شامل ہے۔