پاک فوج نے سیلابی ریلے میں پھنسے خاندان کو ہیلی کاپٹر سے ریسکیو کرلیا، ویڈیو جاری

ریسکیو مشن چکری روڈ پر واقع گاؤں لڈیان میں انجام دیا گیا جہاں شدید بارشوں سے سیلابی صورتحال پیدا ہوگئی؛ آئی ایس پی آر

ساجد علی جمعرات 17 جولائی 2025 13:54

راولپنڈی ( اُردو پوائنٹ اخبارتازہ ترین۔ 17 جولائی 2025ء ) پاک فوج نے سیلابی ریلے میں پھنسے خاندان کو ہیلی کاپٹر سے ریسکیو کر لیا۔ تفصیلات کے مطابق پنجاب کے مختلف علاقوں میں شدید مون سون بارشوں کے نتیجے میں پیدا ہونے والی سیلابی صورت حال کے پیش نظر پاک فوج نے ریسکیو اور ریلیف آپریشن کا آغاز کر دیا ہے، متاثرہ علاقوں میں فوجی ہیلی کاپٹرز، جوانوں اور پولیس اہلکاروں کی مشترکہ کاوشوں سے درجنوں متاثرین کو بحفاظت محفوظ مقامات پر منتقل کیا جا چکا ہے۔

پاک فوج کے شعبہ تعلقات عامہ ( آئی ایس پی آر) نے بتایا ہے کہ ضلع جہلم کے رسول نگر خورد، برہان نالہ، ڈھوک بھیدر اور داراپور سمیت کئی مقامات پر شدید طغیانی دیکھی گئی جہاں متاثرہ افراد کو ہیلی کاپٹرز کی مدد سے نکال کر محفوظ مقامات پر منتقل کیا جارہا ہے فوجی اہلکار متاثرین کو لائف جیکٹس، خوراک، طبی امداد اور دیگر ضروری سامان بھی فراہم کر رہے ہیں۔

(جاری ہے)

پاک فوج نے ہیلی کاپٹر کے ذریعے چکری روڈ پر سیلابی پانی میں پھنسے خاندان کو ریسکیو کر لیا۔۔!! pic.twitter.com/sW7UHR2XJl
— Khurram Iqbal (@khurram143) July 17, 2025

بتایا گیا ہے کہ اس دوران پاک فوج نے ایک اور جرات مندانہ اور بروقت اقدام میں سیلاب میں پھنسے ایک خاندان کو ہیلی کاپٹر کے ذریعے محفوظ مقام پر منتقل کرکے ان کی زندگیاں بچا لیں، اس حوالے سے ریسکیو مشن چکری روڈ پر واقع گاؤں لڈیان میں انجام دیا گیا جہاں شدید بارشوں کے باعث سیلابی صورتحال پیدا ہو چکی تھی جس کی وجہ سے متاثرہ خاندان اپنے گھر کی چھت پر پناہ لینے پر مجبور ہوا کیوں کہ پانی کی سطح مسلسل بلند ہونے سے زمینی راستہ مکمل طور پر منقطع ہو چکا تھا، ایسے میں پاک فوج کے ہیلی کاپٹر نے خراب موسم کے باوجود بروقت کارروائی کرتے ہوئے تینوں افراد کو بحفاظت نکال لیا۔

آئی ایس پی آر کا کہنا ہے کہ پاک فوج کا یہ مشن نا صرف متاثرہ خاندان کے لیے زندگی کی نوید ثابت ہوا بلکہ عوام کے لیے ایک بار پھر یہ پیغام بھی بن گیا کہ قدرتی آفات کے موقع پر مسلح افواج ہمیشہ عوام کے ساتھ کھڑی ہوتی ہیں، مقامی انتظامیہ کے ساتھ مکمل ہم آہنگی کے تحت پاک فوج کے دستے مسلسل صورت حال پر نظر رکھے ہوئے ہے اور کسی بھی ممکنہ خطرے سے نمٹنے کے لیے فورسز الرٹ ہیں، فوج آزمائش کی اس گھڑی میں متاثرین کو تنہا نہیں چھوڑے گی۔