Live Updates

مشرقی دریاؤں میں اونچے درجے کے سیلاب کا خدشہ، این ڈی ایم اے نے ہائی الرٹ جاری کر دیا

یکم تا 3 ستمبر شدید بارشوں اور ڈیموں سے اخراج کے باعث دریائے ستلج، راوی اور چناب میں بہاؤ میں اضافہ متوقع

پیر 1 ستمبر 2025 22:25

مشرقی دریاؤں میں اونچے درجے کے سیلاب کا خدشہ، این ڈی ایم اے نے ہائی ..

اسلام آباد (اُردو پوائنٹ اخبارتازہ ترین۔ 01 ستمبر2025ء) نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشنز سینٹر نے یکم سے 3 ستمبر کے دوران ممکنہ شدید بارشوں کے پیش نظر ملک کے متعدد علاقوں میں سیلاب کا الرٹ جاری کر دیا ہے۔تفصیلات کے مطابق دریائے ستلج میں اس وقت 2 لاکھ 53 ہزار 68 کیوسک کا غیر معمولی بہاؤ موجود ہے، جبکہ بالائی علاقوں میں بارش اور ڈیموں سے مزید پانی کے اخراج کے نتیجے میں 3 لاکھ کیوسک کا سیلابی ریلا متوقع ہے۔

دریائے راوی میں جسر کے مقام پر 60 ہزار 94 کیوسک کا نارمل بہاؤ موجود ہے لیکن بارشوں اور تھین ڈیم سے پانی کے اخراج کے باعث یہ بہاؤ بڑھ کر 1 لاکھ 50 ہزار کیوسک تک جا سکتا ہے۔این ڈی ایم اے کے مطابق بالائی علاقوں میں ممکنہ بارشوں کے نتیجے میں دریائے راوی سے منسلک نالے بین، بسنتر اور ڈیک میں بھی طغیانی کا خدشہ ہے۔

(جاری ہے)

اسی طرح دریائے چناب میں مرالہ کے مقام پر 94 ہزار 728 کیوسک کا نچلی سطح کا بہاؤ موجود ہے، تاہم جموں و کشمیر میں بارشوں اور بالائی ڈیمز (سلال، بگلیہار، ڈل ہستی) سے اخراج کے بعد مرالہ کے مقام پر اونچے درجے کے سیلاب کا خطرہ ہے۔

دریائے چناب کے معاون نالوں جموں توی، منور توی اور پلکو میں بھی شدید طغیانی کی پیش گوئی کی گئی ہے۔این ڈی ایم اے نے خبردار کیا ہے کہ نشیبی اور دریا کنارے کے علاقے زیر آب آ سکتے ہیں، پشتوں میں شگاف اور کھڑی فصلیں و بستیاں متاثر ہو سکتی ہیں۔ مقامی آبادی اور کسانوں کو ہدایت کی گئی ہے کہ وہ ہائی الرٹ رہیں اور بروقت حفاظتی اقدامات اختیار کریں۔

وزیراعظم کی ہدایت پر این ڈی ایم اے تمام ریسکیو و ریلیف سرگرمیوں کی نگرانی کر رہا ہے۔ نیشنل ایمرجنسی آپریشن سینٹر 24 گھنٹے مکمل فعال ہے اور سول و عسکری اداروں کے ساتھ مسلسل رابطے میں ہے۔ عوام کو ہدایت کی گئی ہے کہ وہ دریاؤں کے کناروں اور واٹر ویز پر رہائش اختیار کرنے سے گریز کریں اور فوری طور پر محفوظ مقامات پر منتقل ہو جائیں۔مزید کہا گیا ہے کہ ممکنہ طور پر متاثرہ علاقوں کے مکین انخلا کے دوران اور واپسی کے وقت مقامی انتظامیہ اور امدادی اداروں کی ہدایات پر عمل کریں، سیلاب زدہ علاقوں میں غیر ضروری سفر سے پرہیز کریں، ہنگامی کٹ (پانی، خوراک، ادویات) ہمراہ رکھیں اور اہم دستاویزات محفوظ کریں۔

عوام مزید رہنمائی کے لیے این ڈی ایم اے کی ڈیزاسٹر الرٹ ایپ سے بھی استفادہ کر سکتے ہیں ۔