وزیراعلیٰ پنجاب کی زیر صدارت خصوصی اجلاس ،ٹرانسپورٹ ڈیپارٹمنٹ اور ماس ٹرانزٹ اتھارٹی کے معاملات بارے تفصیلی جائزہ لیاگیا

لاہور (اُردو پوائنٹ اخبارتازہ ترین - اے پی پی۔ 17 جولائی2025ء) وزیراعلی مریم نواز شریف کی زیر صدارت خصوصی اجلاس منعقد ہوا جس میں ٹرانسپورٹ ڈیپارٹمنٹ اور ماس ٹرانزٹ اتھارٹی کے معاملات بارے تفصیلی جائزہ لیاگیا۔اجلاس میں پنجاب میں میٹرو بس اور اورنج لائن کیلئے ڈیجیٹل پیمنٹ سسٹم متعارف کرانے کا فیصلہ کیا گیا۔اجلاس میں بتایا گیا کہ اورنج لائن ٹرین اور میٹروبس میں ٹوکن سسٹم ختم کر دیا جائے گا اور کارڈ بیسڈ پیمنٹ کے ذریعے بار کوڈ سسٹم لایا جائے گا۔

کریڈٹ کارڈ،ڈیبٹ کارڈ/ اے ٹی ایم کارڈ اور موبائل اکاونٹ ایپ کے ذریعے کرائے کی ادائیگی کی جا سکے گی۔ماس ٹرانزٹ سسٹم میں این ایف سی یعنی کارڈ ٹیپ اور ٹیچ کے ذریعے بھی کرایہ ادا کیا جا سکے گا۔لاہور،ملتان،راولپنڈی اور اسلام آباد میں میٹروبس پرکریڈٹ کارڈ اور ڈیبٹ کارڈکے ذریعے ہی کرائے کی ادائیگی ممکن ہوگی۔

(جاری ہے)

لاہور کی اورنج لائن ٹرین میں بھی ا ی پیمنٹ سسٹم لاگو کرکے ٹوکن سسٹم جلد ختم کر دیا جائے گا۔

لاہور کی اورنج لائن ٹرین پر کریڈٹ کارڈ، ڈیبٹ کارڈ، پیمنٹ ایپس کے ذریعے کرایہ ادا کیا جاسکے گا۔اجلاس میں صوبے بھر میں ماس ٹرانزٹ سسٹم کیلئے ایک ہی کارڈ متعارف کرانے کا بھی فیصلہ کیا گیا۔وزیراعلی مریم نواز نے ماس ٹرانزٹ سسٹم کیلئے ٹی کیش کارڈ کی منظوری دے دی۔ٹی کیش کارڈکے ذریعے صوبے بھر میں ہر میٹرو بس یا اورنج لائن پر سفر ممکن ہوگا۔

ماس ٹرانزٹ سسٹم میں سٹوڈنٹس کیلئے الگ کارڈ متعارف کرایا جائے گا۔وزیراعلی مریم نواز نے ٹرانسپورٹ ڈیپارٹمنٹ میں گریڈ5 سے18 تک ٹیکنیکل آسامیوں پر بھرتیوں کی بھی اصولی منظوری دے دی۔اجلاس میں موٹر سائیکل رکشہ کے متبادل کے طور پر الیکٹرک رکشہ متعارف کرانے پر اتفاق کیا گیا ہے۔وزیراعلی مریم نواز نے الیکٹرک رکشہ پراجیکٹ کیلئے تجاویز اور سفارشات طلب کر لیں ہیں۔

وزیراعلی مریم نواز شریف نے پنجاب میں پہلی مرتبہ انٹرنیشنل ٹرانسپورٹ کیلئے ایکسپو کے انعقاد کی بھی اصولی منظوری دے دی۔وزیراعلی مریم نواز نے گاڑیوں سے متعلق تمام امور کیلئے ایک ہی جامع آر ایف آئی ڈی سٹیکر متعارف کرانے کا اعلان بھی کیا۔سیکرٹری ٹرانسپورٹ عمران سکندر بلوچ نے ییلولائن لاہور، گوجرانوالہ بی آر ٹی پر تفصیلی بریفنگ دی۔اجلاس میں بتایا گیا کہ پنجاب کے اضلاع میں الیکٹرک بسوں کی فراہمی اگست سے شروع ہوگی۔اجلاس میں لاہور میں پری فیبری کیٹڈ بس شیلٹر کے ڈیزائن اور کلر کی سفارشات کا بھی جائزہ لیا گیا۔لاہور میں50 پری فیبری کیٹڈ بس شیلٹر کی تنصیب کا کام جلد شروع کر دیا جائے گا۔