آئی پی ایل نے بی سی سی آئی کو مالا مال کردیا

بھارتی بورڈ نے مالی سال 24-2023ء میں 9 ہزار 741 کروڑ روپے سے زیادہ کمائے: بھارتی میڈیا

ذیشان مہتاب جمعہ 18 جولائی 2025 14:36

آئی پی ایل نے بی سی سی آئی کو مالا مال کردیا

ممبئی (اردو پوائنٹ تازہ ترین اخبار ۔ 18 جولائی 2025ء ) بھارتی کرکٹ بورڈ کے پاس موجود دولت سے متعلق بھارتی میڈیا تفصیلات سامنے لے آیا۔

انڈین پریمیئر لیگ بھارتی بورڑ کے لیے کماؤ پوت بن گئی ہے اور آئی پی ایل نے ہی گزشتہ مالی سال میں بھارتی بورڈ کے کُل بجٹ کا آدھے سے زیادہ حصہ کمایا ہے۔

(جاری ہے)

بھارتی میڈیا کے مطابق آئی پی ایل کا بی سی سی آئی کےریو نیو میں 59 فیصد سے زیادہ کا حصہ رہا، بھارتی بورڈ نے مالی سال 24-2023ء میں 9 ہزار 741 کروڑ روپے سے زیادہ کمائے جب کہ بی سی سی آئی کی کُل کمائی میں آئی پی ایل نے 5 ہزار 761 کروڑ کما کر دیے۔

رپورٹس میں بتایا گیا ہے کہ آئی پی ایل کے علاوہ بی سی سی آئی کی آمدنی میں ویمنز پریمیئر لیگ،اسپانسرشپ اور میڈیارائٹس کے پیسے بھی ہیں، بی سی سی آئی کے ریزرو اکاؤنٹس میں 30 ہزار کروڑ کےقریب پیسے پڑے ہیں۔

بھارتی میڈیا کے مطابق سود کی مد میں بی سی سی آئی کو سالانہ ایک ہزار کروڑ روپے آتے ہیں اور بی سی سی آئی کو آئی سی سی سے سالانہ کمائی کی مد میں بھی بڑا شیئر ملتا ہے۔