پاکستان کرکٹ بورڈ نے خواتین کرکٹ سیزن 26-2025 کا کیلنڈر جاری کر دیا

راولپنڈی (اُردو پوائنٹ اخبارتازہ ترین - اے پی پی۔ 18 جولائی2025ء) پاکستان کرکٹ بورڈ نے خواتین کرکٹ سیزن 26-2025 کا تفصیلی کیلنڈر جاری کر دیا ہے جس میں قومی اور انڈر 19 ٹیموں کے متعدد اہم دورے، ورلڈ کپ مقابلے اور مقامی ٹورنامنٹس شامل ہیں۔ پی سی بی کی طرف سے جاری کردہ تفصیلات کے مطابق سیزن کا آغاز قومی خواتین ٹیم کے آئرلینڈ دورے سے ہو گا جہاں اگست میں تین ٹی 20 انٹرنیشنل میچز کھیلے جائیں گے۔

اس کے بعد جنوبی افریقہ ویمنز ٹیم ستمبر میں پاکستان آئے گی اور 16 سے 22 ستمبر تک لاہور میں تین ون ڈے انٹرنیشنل میچز کھیلے جائیں گے۔ ویمنز ون ڈے ورلڈ کپ 30 ستمبر سے 2 نومبر تک شیڈول ہے جس میں پاکستان ویمنز ٹیم اپنے میچز سری لنکا میں کھیلے گی۔ آئندہ سال 7 فروری سے 2 مارچ 2026 تک قومی ٹیم جنوبی افریقہ کا دورہ کرے گی جس میں تین ون ڈے اور تین ٹی 20 میچز شامل ہوں گے۔

(جاری ہے)

اپریل 2026 میں زمبابوے ویمنز ٹیم پاکستان کا دورہ کرے گی جہاں 24 اپریل سے 11 مئی تک تین ون ڈے اور اتنے ہی ٹی 20 انٹرنیشنل میچز کھیلے جائیں گے۔ خواتین ٹی 20 ورلڈ کپ 12 جون سے 5 جولائی 2026 تک انگلینڈ میں کھیلا جائے گا۔ اس سے قبل پاکستان ٹیم آئرلینڈ میں سہ فریقی ٹی 20 سیریز کھیلے گی جس میں ویسٹ انڈیز کی ٹیم بھی شامل ہو گی۔ پاکستان انڈر 19 ویمنز ٹیم دسمبر 2025 میں بنگلہ دیش کا دورہ کرے گی جہاں پانچ ٹی 20 میچز شیڈول ہیں۔

مزید برآں انڈر 19 ویمنز ٹی 20 ٹورنامنٹ 15 ستمبر سے 6 اکتوبر 2025 تک کراچی میں منعقد ہو گا جب کہ خواتین کا انٹر یونیورسٹی کرکٹ ٹورنامنٹ بھی اکتوبر میں شیڈول ہے۔ نیشنل ویمنز ون ڈے ٹورنامنٹ 6 سے 24 نومبر تک کراچی میں ہو گا جب کہ نیشنل ویمنز ٹی 20 ٹورنامنٹ 24 مارچ سے 17 اپریل 2026 تک کھیلا جائے گا۔ دونوں ٹورنامنٹس ڈبل لیگ فارمیٹ پر ہوں گے۔ ہیڈ آف ویمنز کرکٹ رافیہ حیدر کا کہنا ہے کہ 26-2025 کا شیڈول کھلاڑیوں کو کھیلنے کے اچھے مواقع دے گا۔

انہوں نے کہا کہ نوجوان کھلاڑیوں کو آگے لانے کے لیے پاتھ ویز پروگرام مضبوط ہو رہا ہے۔ انڈر 19 ٹورنامنٹ اور بنگلہ دیش کا دورہ نوجوانوں کے لیے بڑا موقع ہیں۔ انہوں نے کہا کہ نیا سیزن اہم ہے کیونکہ اس میں دو ورلڈ کپ جیسے بڑے ایونٹس شامل ہیں۔ اچھے حریفوں کے خلاف کھیلنے سے کھلاڑیوں کی کارکردگی میں بہتری آئے گی۔ انہوں نے کہا خواتین کرکٹ میں ڈیپارٹمنٹس کا ٹورنامنٹ شامل کرنے پر بات چیت جاری ہے۔ یہ سیزن پاکستان ویمنز کرکٹ کے لیے اہم سنگ میل ثابت ہو سکتا ہے جس سے نہ صرف سینئر بلکہ جونیئر سطح پر بھی ٹیلنٹ کو فروغ ملے گا۔