یوم الحاق تاریخ کی وہ روشن صبح ہے جب اہلِ کشمیر نے ڈوگرہ راج کے جبر کو مسترد کر کے پاکستان کو اپنی سیاسی اور روحانی منزل قرار دیا، وزیر داخلہ محسن نقوی

ہفتہ 19 جولائی 2025 11:10

اسلام آباد (اُردو پوائنٹ اخبارتازہ ترین - اے پی پی۔ 19 جولائی2025ء) وفاقی وزیر داخلہ محسن نقوی نے کہا ہے کہ یوم الحاق پاکستان تاریخ کی وہ روشن صبح ہے جب اہلِ کشمیر نے ڈوگرہ راج کے جبر کو مسترد کر کے پاکستان کو اپنی سیاسی اور روحانی منزل قرار دیا،19 جولائی 1947 کو کشمیریوں نے ایک ایسا فیصلہ کیا جو وقت کی گرد، ظلم کی دھند اور بندوقوں کی گونج میں بھی نہ مٹ سکا۔

ہفتے کو یوم الحاق پاکستان کے موقع پر وزیر داخلہ نے اپنے پیغام میں کہا کہ قائداعظم محمد علی جناح کا فرمان ہے کہ "کشمیر پاکستان کی شہ رَگ ہے"یہ آج بھی ہمارے قومی شعور کا مرکز ہے،کشمیر کی فضاؤں میں آج بھی وہی صدائے یقین گونج رہی ہے جسے 1947 کے غیر مسلح مگر غیور کشمیریوں نے بلند کیا تھا۔ محسن نقوی نے کہا کہ بھارتی ریاست کا فوجی جبر، کالے قوانین اور انسانی حقوق کی پامالی کشمیریوں کی وفا کو توڑ سکے نہ جھکا سکے،یوم الحاق پاکستان پر شہدا کو سلام پیش کرتے ہیں جنہوں نے پاکستان سے نظریاتی نسبت کو زندگی سے عزیز تر جانا۔

(جاری ہے)

انہوں نے کہا کہ اقوام متحدہ کی قراردادیں آج بھی منتظر ہیں کہ عالمی ضمیر جاگے اور کشمیریوں کو ان کا جائز حقِ خودارادیت دیا جائے،حریت رہنماؤں کو جیلوں میں ڈال کر، زبانوں کو بند کر کے اور قبریں کھود کر بھی بھارت کشمیریوں کے دل سے پاکستان نہیں نکال سکا۔ وزیر داخلہ نے کہا کہ یوم الحاق پاکستان عالمی برادری کے لیے آئینہ ہے جس میں اسے اپنی خاموشی، بےحسی اور دوہرے معیار کا چہرہ صاف دکھائی دینا چاہیے،یوم الحاق پاکستان تجدیدِ عہد کا دن ہے کہ کشمیریوں کی قربانیاں ہم سب پر امانت ہیں جن کا قرض صرف آزادی ہے۔

محسن نقوی نے کہا کہ انشاءاللہ وہ لمحہ دور نہیں جب بھارت کو کشمیریوں کے جائز حق کے سامنے سرتسلیم خم کرنا پڑے گا،کشمیریوں کی تحریک آزادی میں پاکستان اپنے بھائیوں کی سفارتی، اخلاقی اور سیاسی حمایت جاری رکھے گا۔\932