Live Updates

چکوال میں 450 ملی میٹر بارش کے بعد32 سڑکیں مکمل تباہ، جہلم میں عوام دربدر

سرگودھا میں دریا کنارے آباد 40 سے زائد دیہات سے کئی خاندانوں کو محفوظ مقامات پر پہنچایا گیا

ہفتہ 19 جولائی 2025 12:01

چکوال میں 450 ملی میٹر بارش کے بعد32 سڑکیں مکمل تباہ، جہلم میں عوام دربدر

چکوال، جہلم (اُردو پوائنٹ اخبارتازہ ترین - این این آئی۔ 19 جولائی2025ء)پنجاب میں چکوال اور جہلم میں شدید بارشوں سے درجنوں سڑکیں مکمل تباہ ہو گئیں اور دیہات زیر آب آگئے۔پنجاب کے مختلف علاقوں میں شدید بارشوں نے تباہی مچائی ہوئی ہے، چکوال میں 450 ملی میٹر بارش کے بعد32 سڑکیں مکمل تباہ ہوگئیں جب کہ سیلابی ریلے رابطہ پل بہا لے گئے۔صوبے بھر میں طوفانی بارشوں کے بعد ریسکیو آپریشن جاری ہے، منڈی بہاء الدین میں بپھرے ریلے میں پھنسے خاندان کو بچالیا گیا اور کئی افراد کو محفوظ مقامات پر منتقل کیا گیا۔

(جاری ہے)

سرگودھا میں دریا کنارے آباد 40 سے زائد دیہات سے کئی خاندانوں کو محفوظ مقامات پر پہنچایا گیا، جہلم میں سیلاب میں پھنسے 5 سو افراد محفوظ مقام پر منتقل کیے گئے ہیں جبکہ درجنوں دیہات کو ملانے والی سڑکوں پر تعمیراتی کام جاری ہے۔اس کے علاوہ جہلم میں شدید بارشوں سے 4 یونین کونسلیں شدید متاثر ہوئیں، سیلاب نے لوگوں کو دربدر کردیا، گلیوں میں پانی جمع ہے۔سیلاب کے باعث مقامی افراد نے مویشیوں کو جہلم پنڈ دادن خان روڈ پر لاکر باندھ دیا ہے اور حکومت سے مطالبہ کیا کہ نالہ بہناں پر بند باندھا جائے، سیلاب جہلم کے قریب نالہ بہناں میں بند نہ ہونے کی وجہ سے آیا۔