لاہور میں موٹرسائیکل سواروں کیلئے بغیر ہیلمٹ سواری پر مکمل پابندی عائد

لاہور ( اُردو پوائنٹ اخبارتازہ ترین۔ 19 جولائی 2025ء ) صوبہ پنجاب کے دارالحکومت لاہور میں موٹرسائیکل سواروں کیلئے بغیر ہیلمٹ سواری پر مکمل پابندی عائد کردی گئی۔ تفصیلات کے مطانق لاہور میں ٹریفک قوانین کی سختی سے عملداری کے لیے ایک بڑا اقدام اٹھایا گیا ہے جس کے تحت پیر سے صوبائی دارالحکومت موٹر سائیکل سواروں کے لیے بغیر ہیلمٹ سواری پر مکمل پابندی عائد کر دی گئی ہے۔

اس حوالے سے چیف ٹریفک آفیسر (سی ٹی او) اطہر وحید نے حکم جاری کیا ہے کہ بغیر ہیلمٹ یا نمبر پلیٹ کے موٹر سائیکل چلانے والے افراد خواہ وہ عام شہری ہوں یا اگر پولیس اہلکار بھی ہوئے تو ان کے خلاف یکساں کارروائی کی جائے گی، خلاف ورزی کرنے والے پولیس اہلکاروں کے خلاف مقدمات درج کیے جائیں گے اور ایسے اہلکاروں کے خلاف بھی کارروائی کی جائے گی جو قانون پر عملدرآمد نہیں کروائیں گے۔

(جاری ہے)

ان کا کہنا ہے کہ جو ٹریفک وارڈن قانون شکنی پر کارروائی کرنے میں ناکام رہے گا، اس کی ایک سال کی سروس ضبط کر لی جائے گی، پولیس لائنز میں موجود اہلکاروں کو پہلے ہی ہیلمٹ اور نمبر پلیٹ سے متعلق پابندیوں کے بارے میں آگاہ کر دیا گیا ہے، اس سلسلے میں دو روز کی مہلت دی گئی ہے جس کے بعد پیر سے کسی بھی موٹر سائیکل سوار کو بغیر ہیلمٹ شہر کی سڑکوں پر نظر آنے کی اجازت نہیں دی جائے گی۔

دوسری طرف اسلام آباد میں ٹریفک قوانین کے نفاذ اور چالان کیلئے ڈرون ٹیکنالوجی کا استعمال شروع کردیا گیا، وفاقی ٹریفک پولیس (آئی ٹی پی) نے ایکسپریس وے اور سری نگر ہائی وے سمیت دیگر اہم شاہراہوں پر ٹریفک کی خلاف ورزیوں پر نظر رکھنے کے لیے ڈرون ٹیکنالوجی کے استعمال کا آغاز کردیا ہے، اس حوالے سے حالیہ آپریشنز کے دوران 300 سے زائد ڈرائیوروں کو جرمانے اور 350 سے زائد شہریوں کو رہنمائی بھی فراہم کی گئی۔

آئی ٹی پی حکام کا کہنا ہے کہ چیف ٹریفک آفیسر کیپٹن ریٹائرڈ سید ذیشان حیدر کی قیادت میں اس اقدام کا مقصد ریئل ٹائم مانیٹرنگ کے ذریعے ٹریفک قوانین پر سختی سے عمل درآمد کو یقینی بنانا ہے، ڈرونز کو لین ڈسپلن کی خلاف ورزیوں، اوور لوڈنگ، ون وہیلنگ اور ڈرائیونگ کے دیگر خطرناک رویوں کی نشاندہی کرنے کے لیے استعمال کیا جا رہا ہے۔ انہوں نے مزید بتایا کہ ڈرون کیمروں کے ذریعے حاصل کی گئی فوٹیج کی بنیاد پر قانونی کارروائی کے ذریعے 300 سے زائد ڈرائیوروں کو پہلے ہی جرمانہ کیا جا چکا ہے، آگاہی مہم کے ایک حصے کے طور پر 350 سے زائد شہریوں کو ٹریفک قوانین کے بارے میں آگاہی بھی دی گئی ہے اس کے علاوہ سنگین خلاف ورزیوں میں ملوث متعدد گاڑیوں کو بھی مقامی تھانوں میں بند کر دیا گیا ہے۔