صوبائی وزیر بلدیات کی زیر صدارت ویسٹ ری سائیکلنگ کا جائزہ لینے کیلئے اجلاس

لاہور (اُردو پوائنٹ اخبارتازہ ترین - اے پی پی۔ 19 جولائی2025ء) صوبائی وزیر بلدیات ذیشان رفیق کی زیر صدارت ہفتہ کے روز ویسٹ ری سائیکلنگ کا جائزہ لینے کیلئے سول سیکرٹریٹ میں اہم اجلاس منعقد ہوا جس میں سیکرٹری لوکل گورنمنٹ شکیل احمد میاں اور ایڈیشنل سیکرٹری ڈویلپمنٹ احمر کیفی سمیت دیگر افسران نے شرکت کی۔ اس موقع پر لاہور ویسٹ مینجمنٹ کمپنی(ایل ڈبلیو ایم سی) کے سی ای او بابر صاحب دین نے اجلاس کو بریفنگ دی ۔

وزیر بلدیات ذیشان رفیق نے کہا کہ پیرس معاہدے کے آرٹیکل چھ کے تحت کاربن کریڈٹ کا کلیم کیا جائے گا، جانوروں کی آلائشوں سے توانائی پیدا کرنے کا منصوبہ زیر غور ہے، صرف لاہور میں آلائشوں سے ایک ہزار ٹن توانائی پیدا کی جاسکتی ہے۔ وزیر بلدیات نے ویسٹ سے توانائی کے منصوبوں کے لئے لاہور یا اسلام آباد میں روڈ شو منعقد کرنے کی ہدایت کرتے ہوئے کہا کہ غیرملکی سفارتکاروں کو روڈ شو میں مدعو کیا جائے گا، بیرون ملک بھی روڈ شوز کر کے سرمایہ کاروں کو متوجہ کریں گے، پنجاب حکومت اس منصوبے کے تحت لاہور کے نواح میں ری سائیکلنگ پارک بنانے کا ارادہ رکھتی ہے،لکھوڈیر سائٹ میں 20 ٹن بائیوگیس پیدا کرنے کی صلاحیت ہے۔

(جاری ہے)

ذیشان رفیق نے اس عزم کا اظہار کیا کہ وزیراعلی مریم نواز کے ویژن کے مطابق لاہور کے بعد دیگر شہروں میں بھی ویسٹ کو بروئے کار لایا جائے گا۔سیکرٹری بلدیات شکیل احمد میاں نے سی ای او ایل ڈبلیو ایم سی کو وزیراعلی کیلئے جامع پریذینٹیشن بنانے کی ہدایت کرتے ہوئے کہا کہ ویسٹ کو پوری دنیا میں میں قابل استعمال بنایا جا رہا ہے کیونکہ ری سائیکلنگ ہی ویسٹ کے ماحولیاتی نقصانات کا حل ہے۔

بابر صاحب دین نے بتایا کہ لاہور کے نواح میں واقع لکھوڈیر سائٹ کے کاربن کریڈٹ سے پاکستان کو سالانہ ایک ارب روپے ریونیو متوقع ہے جبکہ محکمہ توانائی کے تعاون سے 50 میگاواٹ پاور پلانٹ کا منصوبہ بھی زیر غور ہے، لاہور میں ہر روز ستھرا پنجاب کے تحت بڑی مقدار میں ویسٹ جمع ہوتا ہے۔ انہوں نے بتایا کہ کئی ملکی اور غیر ملکی کمپنیوں نے ویسٹ کی ری سائیکلنگ میں دلچسپی ظاہر کی ہے۔