سندھ حکومت کا معرکہ حق اور یومِ آزادی کے سلسلے میں نمائشی میچز کرانے کا فیصلہ

ہفتہ 19 جولائی 2025 19:45

کراچی (اُردو پوائنٹ اخبارتازہ ترین - اے پی پی۔ 19 جولائی2025ء) سندھ حکومت کی جانب سے معرکہ حق اور یومِ آزادی 14اگست 2025کے سلسلے میں کراچی میں منسٹر الیون، میئر الیون، گورنر الیون اور وزیراعلیٰ الیون کے درمیان نمائشی کرکٹ میچز منعقد کیے جائیں گے۔ہفتہ کو جاری اعلامیہ میں صوبائی وزیر کھیل سندھ سردار محمد بخش مہر کے مطابق 8اگست کو منسٹر الیون اور میئر الیون کے درمیان نائٹ کرکٹ میچ البرہانی اسپورٹس کمپلیکس کراچی میں کھیلا جائے گا جبکہ 9اگست کو وزیراعلی سندھ الیون اور گورنر سندھ الیون کے درمیان نمائشی میچ معین خان اکیڈمی ڈی ایچ اے کراچی میں ہوگا۔

انہوں نے کہا کہ 10اگست کو کراچی میں نشانی پاکستان سے دو دریا تک میراتھن ریس منعقد کی جائے گی جبکہ 14اگست کو صبح 6:30بجے فریئر ہال سے مزار قائد تک سائیکل ریس اور صبح 10 بجے کلفٹن سے فریئر ہال تک گدھا گاڑی ریس کرائی جائے گی۔

(جاری ہے)

وزیر کھیل نے کہا کہ کراچی ڈویژن کے ساتوں اضلاع میں یکم سے 13اگست تک مجموعی طور پر 27کھیلوں کے مقابلے منعقد کیے جائیں گے، جن میں لڑکے اور لڑکیاں بھرپور حصہ لیں گے۔

ضلع شرقی میں یکم اور 2اگست کو پیرا اسپورٹس، والی بال اور بیڈمنٹن کے مقابلے ہوں گے، ضلع غربی میں 2اور 3 اگست کو باکسنگ اور تائیکوانڈو کے ایونٹس اور ضلع ملیر میں 5اور 6اگست کو تائیکوانڈو اور باکسنگ کے مقابلے ہوں گے۔ضلع کورنگی میں 7تا 9اگست تک ایتھلیٹکس، تائیکوانڈو، بیڈمنٹن اور والی بال کے مقابلے کرائے جائیں گے جبکہ ضلع جنوبی میں 11اور 12اگست کو بیچ والی بال، بیچ ٹینس، ٹگ آف وار اوربیچ کبڈی کے دلچسپ ایونٹس ہوں گے۔

ضلع وسطی میں 12اور 13اگست کو جمناسٹک اور ٹیبل ٹینس کے مقابلے اور ضلع کیماڑی میں 12تا 13اگست کو تھرو بال، باکسنگ، کرکٹ اور فٹبال کے گرلز و بوائز کے درمیان مقابلے ہوں گے۔وزیر کھیل نے کہا کہ سندھ کے تمام اضلاع میں 14اگست کے دن پرچم کشائی، قومی ترانہ اور کیک کاٹنے کی تقریبات بھی منعقد کی جائیں گی۔