ملک بھر میں مون سون کی شدید بارشوں کا امکان، این ڈی ایم اے نے ممکنہ سیلابی صورتحال پر الرٹ جاری کر دیا

ہفتہ 19 جولائی 2025 22:09

اسلام آباد (اُردو پوائنٹ اخبارتازہ ترین - آن لائن۔ 19 جولائی2025ء) ملک بھر میں 19 تا 25 جولائی متوقع مون سون بارشوں کے پیش نظر نیشنل ڈیزاسٹر مینجمنٹ اتھارٹی (این ڈی ایم ای) نے ممکنہ سیلابی صورتحال، لینڈ سلائیڈنگ اور اربن فلڈنگ کے خدشے پر الرٹ جاری کر دیا ہے۔ ادارے نے تمام شہریوں، مقامی انتظامیہ اور متعلقہ محکموں کو پیشگی حفاظتی اقدامات کی ہدایات جاری کر دی ہیں۔

این ڈی ایم اے کے مطابق، خیبر پختونخوا کے اضلاع نوشہرہ، مالاکنڈ، سوات، دیر اور دیگر بالائی پہاڑی علاقوں میں دریائے کابل، سوات، پنجکوڑہ، کالپنی نالہ اور بارہ نالہ میں طغیانی کا خطرہ ہے، جبکہ لینڈ سلائیڈنگ کا بھی امکان ہے۔ اسی طرح پنجاب کے مختلف شہروں بشمول راولپنڈی، لاہور، فیصل آباد، ملتان، خانیوال، u ساہیوال، مظفرگڑھ، کوٹ ادو، تونسہ، راجن پور، بہاولپور اور رحیم یار خان میں شدید بارشوں اور نشیبی علاقوں کے زیر آب آنے کا خطرہ ظاہر کیا گیا ہے۔

(جاری ہے)

کراچی، حیدرآباد، سکھر، جیکب آباد، بدین، لاڑکانہ، جامشورو، نوابشاہ، میرپورخاص اور ٹھٹھہ سمیت سندھ کے بیشتر اضلاع میں بھی بارشوں کے باعث شہری علاقوں میں سڑکوں، گلیوں اور انڈرپاسز میں پانی جمع ہونے کا خدشہ ظاہر کیا گیا ہے۔این ڈی ایم اے نے شہریوں کو ہدایت کی ہے کہ ندی نالوں، پلوں اور پانی میں ڈوبی سڑکوں سے گزرنے سے گریز کریں۔

نشیبی علاقوں میں رہائش پذیر افراد قیمتی اشیاء اور مویشیوں کو محفوظ مقامات پر منتقل کرنے کا بندوبست کریں۔ مقامی انتظامیہ نکاسی آب کے لیے مشینری اور پمپس تیار رکھے اور فوری اقدامات یقینی بنائے۔ عوام سے اپیل کی گئی ہے کہ وہ تازہ ترین صورتحال سے باخبر رہنے کے لیے پاک این ڈی ایم اے ڈیزاسٹر الرٹ ایپ سے رہنمائی حاصل کریں اور سرکاری اعلانات پر عمل کریں۔