جرائم کی شرح میں کمی کیلئے اسلام آباد میں مزید 3 ہزار سے زائد کیمرے لگانے کا فیصلہ

اسلام آباد (اُردو پوائنٹ اخبارتازہ ترین - اے پی پی۔ 20 جولائی2025ء) ‎وفاقی وزیر داخلہ محسن نقوی نے کہا ہے کہ سیف سٹی پراجیکٹ نے جرائم کی روک تھام اور فوری رسپانس میں اہم کردار ادا کیا ہے، ‎سرویلنس کے نظام کو جدید ٹیکنالوجی اور اے آئی سے لیس کیا جائے،‎تمام سیف سٹیز کو آپس میں جوڑنے سے ڈیٹا شیئرنگ میں بہتری آئے گی۔ وزارت داخلہ کے مطابق ‎وفاقی وزیر داخلہ محسن نقوی نے اسلام آباد سیف سٹی ہیڈ کوارٹرز کے دورہ کے موقع پر آن لائن ویمن پولیس سٹیشن اور ون انفو (1info) موبائل ایپلی کیشن کا باقاعدہ افتتاح کیا۔

انہوں نے آئی جی اسلام آباد پولیس علی ناصر رضوی اور ان کی ٹیم کے نئے اقدامات کو سراہا اور ڈیجیٹل وال پر شہر کی مانیٹرنگ کے عمل کا مشاہدہ بھی کیا۔ محسن نقوی نے اس موقع پر کہا کہ ایپ سے ایمرجنسی شکایات درج کرائی جاسکیں گی۔

(جاری ہے)

وفاقی وزیر داخلہ محسن نقوی نے خواتین اور کمزور طبقات کی فوری مدد کے لئے آن لائن پلیٹ فارمز کو مزید فعال بنانے کی ہدایت کرتے ہوئے کہا کہ ایپ اور آن لائن ویمن پولیس سٹیشن جدید ٹیکنالوجی کے استعمال کے سلسلے میں ہمارے عزم کے عکاس ہیں۔

اس موقع پر وزیر مملکت داخلہ طلال چوہدری، سیکرٹری داخلہ، چیف کمشنر اسلام آباد اور آئی جی اسلام آباد پولیس بھی موجود تھے۔ وزیر داخلہ محسن نقوی نے سیف سٹی ہیڈکوارٹرز میں اہم اجلاس کی صدارت کے دوران کہا کہ سیف سٹی پراجیکٹ نے جرائم کی روک تھام اور فوری رسپانس میں اہم کردار ادا کیا ہے۔ انہوں نے سیف سٹی کی مانیٹرنگ کو مزید مؤثر بنانے کی ہدایت کرتے ہوئے کہا کہ ‎سرویلنس کے نظام کو جدید ٹیکنالوجی اور اے آئی سے لیس کیا جائے ، انہوں نے کہا کہ اسلام آباد کو محفوظ ترین شہر بنانے کے لئے سیف سٹی منصوبے کو ماڈل کے طور پر اپنایا جائے گا۔

‎وزیر داخلہ سیف سٹی اسلام آباد کو دیگر صوبوں کے سیف سٹییز سے منسلک کرنے پر بھی کام کرنے کی ہدایت کی اور کہا کہ ‎تمام سیف سٹیز کو آپس میں جوڑنے سے ڈیٹا شیئرنگ میں بہتری آئے گی۔‎وزیر داخلہ نے سیف سٹی سٹاف کی کارکردگی کو سراہا، مزید محنت اور لگن سے کام کرنے کی ہدایت‎بھی کی۔ انہوں نے سیف سٹی میں تعینات عملے کو عوامی خدمت کو اولین ترجیح دینے کی تلقین کی اور سیف سٹی ٹیم کے جذبے اور کارکردگی کو بھی سراہا‎۔

اجلاس کے دوران ‎آئی جی اسلام آباد علی ناصر رضوی نے وزیر داخلہ کو سیف سٹی پر تفصیلی بریفنگ میں بتایا کہ ‎وفاقی دارالحکومت کے علاقوں کو 3100کیمروں سے مانیٹر کیا جا رہا ہے،‎سسٹم کو مزید وسعت دینے کے لیے 3100 نئے کیمرے نصب کئے جائیں گے۔ بریفنگ میں بتایا گیا کہ ‎‎سیف سٹی اسلام آباد نے سردار فہیم قتل سمیت کئی ہائی پروفائل کیسز میں کلیدی کردار ادا کیا،‎سیف سٹی کیمروں کی مدد سے متعدد اہم مقدمات کی تفتیش میں پیش رفت ہوئی، ‎سیف سٹی کیمروں کی مدد سے اسلام آباد میں جرائم کی شرح میں نمایاں کمی آئی ہے۔

علی ناصر رضوی نے بتایا کہ آن لائن و یمن پولیس سٹیشن خواتین کیلئے بنایا گیا ہے اور خواتین کیلئے ہیلپ لائن 1815 مختص کی گئی ہے،1815 ہیلپ لائن پر کال ٹیکر،کال ریسپانڈر اور تفتیشی افسران بھی خواتین پولیس اہلکار ہیں۔932