پاکستان ہماری امیدوں،آرزوؤں اور امنگوں کا مرکز ہے،چوہدری نعیم اختر

اتوار 20 جولائی 2025 14:45

پیرس(اُردو پوائنٹ اخبارتازہ ترین - این این آئی۔ 20 جولائی2025ء)چیئرمین جموں وکشمیر فورم فرانس چوہدری نعیم اختر نے کہا ہے کہ پاکستان ہماری امیدوں،آرزوؤں اور امنگوں کا مرکز ہے،پاکستان اللہ تعالیٰ کا خصوصی انعام اور کشمیریوں کی منزل ہے۔ قیام پاکستان سے قبل 19 جولائی 1947 کو ریاست جموں وکشمیر کی مسلمہ قیادت نے قرارداد الحاق پاکستان کی صورت میں اپنا مستقبل پاکستان کے ساتھ استوار کر کے کشمیری عوام کی منزل کا تعین کردیا تھا جس کے حصول کیلئے کشمیری عوام سات دہائیوں سے زائد عرصہ سے جدوجہد آزادی میں مصروف عمل ہیں ہمارے اسلاف نے جس منزل کی نشاندہی کی تھی،ہم اسے حاصل کر کے رہیں گے دنیا کی کوئی طاقت کشمیری عوام کو انکی منزل کے حصول سے نہیں روک سکتی۔

ان خیالات کا اظہار انہوں نے یوم الحاق پاکستان کے موقع پر اپنے خصوصی بیان میں کیا۔

(جاری ہے)

چوہدری نعیم اختر نے کہا کہ ہم مسئلہ کشمیر کا پرامن،عوامی خواہشات کے مطابق حل چاہتے ہیں،بھارتی ظلم وستم کشمیریوں کے جذبے کو کمزور نہیں کر سکتے۔انہوں نے کہا کہ پاکستان کی حکومت اور عوام نے ہمیشہ کشمیریوں کا ساتھ دیا اور اخلاقی، سفارتی اور سیاسی حمایت جاری رکھی ہے۔یومِ الحاقِ پاکستان کے موقع پر اس عہد کی تجدید کرتے ہیں کہ ہم ریاست جموں و کشمیر کی مکمل آزادی تک کسی قربانی سے دریغ نہیں کریں گے۔