Live Updates

سینیٹ الیکشن کے ناراض امیدواروں کیخلاف پارٹی کارروائی کرے گی، علی امین گنڈاپور کا اعلان

عمران خان کے فیصلے کی نفی بانی پی ٹی آئی کی نفی ہے، ہارس ٹریڈنگ کو ڈونکی ٹریڈنگ کہتا ہوں، فیصلہ کیا ہے سینیٹ میں خرید و فروخت نہیں ہونی چاہیئے؛ وزیراعلیٰ خیبرپختونخواہ کی میڈیا سے گفتگو

ساجد علی اتوار 20 جولائی 2025 18:15

سینیٹ الیکشن کے ناراض امیدواروں کیخلاف پارٹی کارروائی کرے گی، علی ..

پشاور ( اُردو پوائنٹ اخبارتازہ ترین۔ 20 جولائی2025ء ) وزیراعلیٰ خیبرپختونخواہ علی مین گنڈاپور کا کہنا ہے کہ سینیٹ الیکشن کے ناراض امیدواروں کیخلاف پارٹی کارروائی کرے گی۔ تفصیلات کے مطابق خیبرپختونخواہ اسمبلی میں سینیٹ انتخابات سے متعلق حکومت اور اپوزیشن کا اجلاس ہوا، اجلاس میں وزیراعلیٰ علی مین گنڈاپور، اپوزیشن لیڈر ڈاکٹرعباداللہ اور سپیکر بابر سلیم سواتی شریک ہوئے۔

اجلاس کے بعد میڈیا سے گفتگو کرتے ہوئے علی مین گنڈاپور نے کہا کہ اپوزیشن اور حکومت کے درمیان دھوکا دہی نہیں ہوگی، ہارس ٹریڈنگ کو ڈونکی ٹریڈنگ کہتا ہوں، گھوڑا ایک بڑا قابل عزت جانور ہے میں خود گھوڑوں کا بہت شوقین ہوں، دیکھا جائے تو گدھا بھی خدمت کرنے والا جانور ہے، سینیٹ میں خرید و فروخت اس سے بھی گھٹیا کام ہے، فیصلہ کیا ہے کہ سینٹ میں خرید و فروخت نہیں ہونی چاہیئے۔

(جاری ہے)

وزیراعلیٰ کا کہنا ہے کہ صوبے کی تاریخ میں پہلی بار اتنا اچھا فیصلہ ہورہا ہے، اس سے پہلے پنجاب سینیٹ انتخابات میں ہم نے یہی کیا ہے، بانی پی ٹی آئی نے جو فیصلہ کیا تھا اسی فارمولے پرعمل کریں گے، عدالتی احکامات کے تحت اب مخصوص نشستوں کے منتخب اراکین گورنر ہاؤس میں حلف لے رہے ہیں، ناراض امیدواروں کے خلاف پارٹی کارروائی کرے گی، عمران خان کے فیصلے کی نفی بانی پی ٹی آئی کی نفی ہے۔

انہوں نے مزید یہ بھی کہا کہ اپوزیشن سے اتحاد صرف سینیٹ انتخابات تک ہے، اپوزیشن کے ساتھ پہلے 8 اور 3 کے فارمولے پر اتفاق ہوا تھا، ہمارے امیدواروں کی جانب سے کاغذات واپس نہ لینے سے ہمیں نقصان ہوا، اب ہمیں 6 اور اپوزیشن کو 5 نشستیں ملیں گی، جو بھی ہورہا ہے وہ بانی پی ٹی آئی کے احکامات پر ہورہا ہے۔