اختر مینگل کو بیرون ملک جانے سے روک دیا گیا،پرواز سے آف لوڈ

اتوار 20 جولائی 2025 20:20

اسلام آباد(اُردو پوائنٹ اخبارتازہ ترین - این این آئی۔ 20 جولائی2025ء)بلوچستان نیشنل پارٹی کے سربراہ سردار اختر مینگل کو بیرون ملک سفر سے روک دیا گیا۔نجی ٹی وی کے مطابق ایف آئی اے نے کوئٹہ سے دبئی جانے والی نجی ایئر لائن کی پرواز سے اختر مینگل کو آف لوڈ کر دیا۔ایف آئی اے نے بتایاکہ اختر مینگل کا نام پروویشنل نیشنل آئیڈینٹیفکیشن لسٹ (پی این آئی ایل)میں شامل ہے۔

(جاری ہے)

اس حوالے سے سردار اختر مینگل نے کہاہے کہ امیگریشن اسٹاف نے مجھے آف لوڈ کرتے ہوئے بتایاکہ میرا نام پی این آئی ایل میں ہے۔سابق وفاقی وزیر آغا حسن اور غلام نبی مری نے اختر مینگل کو آف لوڈ کیے جانے کی مذمت کرتے ہوئے کہا کہ اختر مینگل کو بیرون ملک سفر سے روکنا غیر قانونی اور غیر آئینی ہے۔انہوں نے کہا کہ اختر مینگل تاحال رکن قومی اسمبلی ہیں، ان کا استعفیٰ بھی ابھی منظور نہیں کیا گیا۔