Live Updates

ایک آدھا انڈہ خراب ہوتا ہے جسکی وجہ سے سب خراب ہوجاتا ہے، پاک بھارت ٹاکرا نہ ہونے پر شاہد آفریدی کا ردعمل

مجھے پتہ ہوتا کہ یہ میری وجہ سے ہورہا ہے تو میں گراؤنڈ نہ جاتا ، کرکٹ ہونی چاہیے کیونکہ سپورٹس سب سے بڑی ہے ،اگر کسی ایک آدھ نے کہا تھا کہ میں نے پاکستان کیخلاف نہیں کھیلنا تو وہ باہر بیٹھ جاتا : سابق کپتان

ذیشان مہتاب پیر 21 جولائی 2025 11:47

ایک آدھا انڈہ خراب ہوتا ہے جسکی وجہ سے سب خراب ہوجاتا ہے، پاک بھارت ..

لندن (اردو پوائنٹ تازہ ترین اخبار ۔ 21 جولائی 2025ء ) قومی کرکٹ ٹیم کے سابق کپتان شاہد آفریدی نے ورلڈ چیمپینز لیگ میں پاک بھارت ٹاکرا نہ ہونے پر کہا ہے کہ صرف ایک آدھ لڑکے کی وجہ سے یہ فیصلہ ہوا اور اس پر بھارتی ٹیم کے کھلاڑیوں کو بہت مایوسی ہوئی ہے کیونکہ وہ کھیلنا چاہتے تھے، اگرمجھے پتہ ہوتا کہ یہ میری وجہ سے ہورہا ہے تو میں گراؤنڈ نہ جاتا لیکن کرکٹ ہونی چاہیے کیونکہ سپورٹس سب سے بڑی ہے ، اگر کسی ایک آدھ نے کہا تھا کہ میں نے پاکستان کے خلاف نہیں کھیلنا تو وہ باہر بیٹھ جاتا۔

ان کا کہنا تھا کہ ایک آدھا انڈہ خراب ہوتا ہے جس کی وجہ سے سب خراب ہوجاتا ہے، ہمیں اپنے ملک کے لیے شرمندگی کا باعث نہیں بننا چاہیے۔

ورلڈ چیمپینز لیگ کے پاکستان اور بھارت کے درمیان میچ نہ ہونے پربات کرتے ہوئے شاہد آفریدی نے کہاکہ بد قسمتی سے یہ میچ نہیں ہوسکا، اگر آج ہم گراؤنڈ میں ہوتے اور سترہ اٹھارہ ہزار لوگ سٹیڈیم میں میچ سے لطف اندوز ہوتے تو کافی اچھاتھا ، فینز کو یقینی طور پر مایوسی ہوگی۔

(جاری ہے)

انہوں نے کہا کہ بیرون ملک دوروں کے دوران بھارتی لوگوں سے بہت اچھے انداز میں بات چیت ہوتی رہتی ہے، دونوں ممالک کو قریب لانے کے لیے سپورٹس ڈپلومیسی اچھی آپشن ہے لیکن اگر اس میں بھی سیاست آجائے گی تو پھر ہم آگے کیسے بڑھیں گے ، اگر ہم ساتھ نہیں بیٹھیں گے ، بات چیت نہیں کریں گے تو ایشوز مزید بڑھیں گے۔